ԵՐԵՎԱՆ, 28 հունվարի – Sputnik. Ամենայն հայոց կաթողիկոս Գարեգին Բ-ն այսօր Հայոց բանակի կազմավորման 30-ամյակի առիթով այցելեց «Եռաբլուր» զինվորական պանթեոն: Նրան ուղեկցում էին հոգևորականներ:
«Այսօր մեր բանակի օրն է, և մենք միաբան մեր հայրերի հետ բարձրացանք այստեղ, որպեսզի մեր աղոթքն առ Աստված բարձրացնենք, մեր քաջարի զավակների հոգիների հանգստության համար։ Ինչպես նաև հայցենք, որ Տերը օրհնի մեր ժողովրդի կյանքը` ապրելու խաղաղության և ապահովության, բարօրության մեջ։ Նաև մեր հայցն առ Աստված բարձրացրեցինք, որպեսզի Տիրոջ օրհնությամբ զորանա Հայոց բանակը և պաշտպանի խաղաղ, անվտանգ կյանքը մեր երկրի, մեր ժողովրդի»,-լրագրողների հետ զրույցում ասաց կաթողիկոսը։
Նա հրաժարվեց պատասխանել լրագրողների այն հարցին, թե ինչու պետական պաշտոնյաների հետ չի այցելում Եռաբլուր։
Նշենք, որ արդեն ավանդույթ է դարձել, որ Գարեգին Բ-ն Եռաբլուր կամ Ցեղասպանության հուշահամալիր այցելում է իշխանության ներկայացուցիչներից առանձին, մինչդեռ նախկինում այդպես չէր:
Այսօր, ավելի վաղ, Եռաբուր են այցելել ԱԺ նախագահ Ալեն Սիմոնյանը, պաշտպանության նախարար Սուրեն Պապիկյանը, ԱԽ քարտուղար Արմեն Գրիգորյանը, ԱԳ նախարար Արարատ Միրզոյանը, ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը, Երևանի քաղաքապետ Հրաչյա Սարգսյանը, մի շարք նախարարներ և «Քաղաքացիական պայմանագիր» խմբակցության պատգամավորներ։
Հիշեցնենք` ՀՀ վարչապետ Նիկոլ Փաշինյանը վարակվել է կորոնավիրուսով և ինքնամեկուսացել: