ԵՐԵՎԱՆ, 27 հունվարի – Sputnik. ՀՀ արդարադատության նախարարությունն առաջարկում է փոփոխություններ կատարել «Արժեթղթերի շուկայի մասին» օրենքում և ՀՀ Հակակոռուպցիոն կոմիտեին իրավունք վերապահել անարգել ծանոթանալ Կենտրոնական դեպոզիտարիայի հաճախորդների բացած արժեթղթերի հաշիվների ցանկին, յուրաքանչյուր հաշվի տեսակին, ինչպես նաև բաժնետոմսերի և բաժնետոմսերի սեփականատերերի վերաբերյալ ցանկացած տեղեկության։
Ընդ որում` խոսքը ոչ միայն հայաստանյան, այլև օտարերկրյա սեփականատերերի մասին է։
Նախագծի ընդունման անհրաժեշտությունը, ըստ ԱՆ–ի պայմանավորված է Հակակոռուպցիոն կոմիտեի լիիրավ գործունեության ապահովման հրամայականով։
Կառավարությունն այսօրվա նիստում միաձայն հավանություն տվեց նախարարության առաջարկած նախագծին։ Այն առաջիկայում կներկայացվի ԱԺ–ի դատին։