ԵՐԵՎԱՆ, 27 հունվարի – Sputnik. Ռուսաստանի և ՆԱՏՕ–ի անմիջական ռազմական բախումը, եթե Ուկրաինան որոշի հարձակվել Դոնբասի վրա, կատաստրոֆիկ սցենար կլինի, որը ոչ մի դեպքում չի կարելի թույլ տալ։ Այս մասին, ՌԻԱ Նովոստիի փոխանցմամբ, ռուսական առաջատար ԶԼՄ–ներին տված հարցազրույցում հայտարարել է ՌԴ ԱԽ փոխնախագահ Դմիտրի Մեդվեդևը։
«Դա շատ դրամատիկ, պարզապես աղետալի սցենար կլինի։ Հույս ունեմ, որ նման բան երբեք տեղի չի ունենա։ Թեպետ ՆԱՏՕ–ի երկրներում և ԱՄՆ–ում որոշ խելագարներ, որոշ տաք գլուխներ քննարկում են այդ թեման։ Սակայն հույս ունեմ, որ նման բան երբեք տեղի չի ունենա», – նշեց Մեդվեդևը։
ՌԴ ԱԽ փոխնախագահը կարծում է, որ Ուկրաինան այսօր ԱՄՆ–ի և ՆԱՏՕ–ի ձեռքում «խաղալիքի» է վերածվել և օգտագործվում է Մոսկվայի վրա աշխարհաքաղաքական ճնշում գործադրելու համար։
«Ուկրաինան ինքնին ամերիկացիներին պետք չէ, եվրոպացիներին էլ առանձնակի պետք չէ։ Սակայն սա գործիք է Ռուսաստանի և որոշ չափով նաև Չինաստանի դեմ աշխարհաքաղաքական խաղում», – հավելել է նա։
Ռուսաստանը բազմիցս հերքել է «ագրեսիվ գործողությունների» վերաբերյալ Արևմուտքի և Ուկրաինայի մեղադրանքները՝ հայտարարելով, որ որևէ մեկին չի սպառնում և որևէ մեկի վրա մտադիր չէ հարձակվել, իսկ «ՌԴ–ի ագրեսիայի» մասին հայտարարություններն օգտագործվում են որպես պատրվակ, ռուսական սահմանների մոտ ավելի շատ ՆԱՏՕ–ի ռազմատեխնիկա տեղակայելու համար։