ԵՐԵՎԱՆ, 22 հունվարի – Sputnik. Երևանում, Էրեբունու տարածքում կառուցվող եկեղեցու բակում, վագոն-տնակի մեջ հայտնաբերվել է ցրտահարված տղամարդու դի։ Տեղեկությունը հայտնում է shamshyan.com–ը։
Ըստ հաղորդագրության` այսօր, ժամը 12։40-ի սահմանում ոստիկանության Էրեբունու բաժինն ահազանգ է ստացել, որ Աթոյան անցուղի 12/3 շենքի դիմաց գտնվող տարածքում տեղադրված վագոն-տնակում տղամարդու դի կա։
Դեպքի վայր են մեկնել ոստիկանները։ Պարեկները սահմանազատել են տարածքը, որպեսզի դատաբժիշկը զննի դին։
Ըստ դատաբժշկի նախնական եզրակացության՝ դիակի վրա բռնության հետքեր չեն հայտնաբերվել։ Տղամարդը ցրտահարվել է։
Իրավապահները պարզել են, որ մահացածը մշտական բնակության վայր չունեցող, 48-ամյա Տիգրան Այվազյանն էր։
Հետաքննիչի որոշմամբ նշանակվել է դիակի դատաբժշկական փորձաքննություն։