ԵՐԵՎԱՆ, 21 հունվարի –Sputnik․ Ադրբեջանը խախտում է եռակողմ հայտարարության 1-ին կետում նշված «կրակի ու ռազմական գործողությունների լիակատար դադարեցման» պայմանը։ 2020թ․ նոյեմբերի 9-ից մինչև 2022 թ․ հունվարի 1-ն Ադրբեջանի զինված ուժերի կողմից 69 հանցագործություն է կատարել արցախահայության նկատմամբ։ Դրանցից 54-ի դեպքում հարուցվել են քրեական գործեր։ Տեղեկությունը հայտնում է Արցախի դատախազության մամուլի ծառայությունը։
«Արձանագրվել է սպանության 5 հանցավոր դեպք (քաղաքացիական անձանց սպանության` 3 դեպք), սպանության փորձի՝ 28 (որից 19-ը` ուղղված զինվորականների դեմ), ահաբեկչական գործողության՝ 1, հրազենի գործադրմամբ գույքի ոչնչացման՝ 16 (որից 10-ը` ռազմական գույքի ոչնչացում կամ վնասում), գույքի ոչնչացման ու վնասման փորձի՝ 5, գողության՝ 3, կողոպուտի՝ 2, գերեզմանները ոչնչացնելու՝ 3, խոշտանգման՝ 4, սպանության սպառնալիք տալու և մարդու առևանգման՝ 1-ական դեպքեր»,- նշված է հաղորդագրության մեջ։
Ադրբեջանական զինված ծառայողների կողմից սպանվել են 3 քաղաքացիական անձ, 10 զինվորական, սպանության փորձ է կատարվել 77 անձի նկատմամբ (50 զինվորական), տարբեր աստիճանի հրազենային վիրավորում է ստացել 37 անձ (28 զինվորական), ֆիզիկական բռնության է ենթարկվել 8-ը, սպանության սպառնալիքի` 2-ը:
Արցախցիներին պատճառվել է 17.710.000 դրամի գույքային վնաս, հափշտակվել են խոշոր եղջերավոր անասուններ և մեկ տրանսպորտային միջոց:
Խոցվել կամ թիրախավորվել են 9 բնակելի տուն, 3 գյուղատնտեսական տեխնիկա, 9 տրանսպորտային միջոց (7-ը` ռազմական), շինարարական 2 տեխնիկա, հրկիզվել է 3 այգի ու ցանքատարածք, հրազենի գործադրմամբ հեռահար թիրախավորվել է խոշոր եղջերավոր անասունների 1 խմբաքանակ, պատճառվել առանձնապես խոշոր չափերի գույքային վնաս:
ԱՀ դատախազությունը շեշտում է, որ բացի նշված դեպքերից, 2020թ. նոյեմբերից մինչ օրս Ստեփանակերտ քաղաքի, Ասկերանի, Մարտունու և Շուշիի շրջանների գյուղերի հարևանությամբ տեղակայված ադրբեջանական դիրքերից պարբերաբար տարբեր տրամաչափի հրաձգային զինատեսակներից կրակոցներ են արձակվում մոտակա հայկական բնակավայրերի ուղղությամբ կամ օդ։
Արձակված կրակոցների հետևանքով վնասվում են բնակելի տների և այլ շինությունների պատերը:
Ադրբեջանի կողմից եռակողմ հայտարարության կոպիտ խախտման հետևանքով սպանվում են մարդիկ, խախտվում են մարդու հիմնարար իրավունքները:
Դատախազությունն ընդգծում է՝ Ադրբեջանի ահաբեկչական ու ցեղասպան գործողությունների ընդարձակումը զսպում են հայ զինվորն ու ռուսական խաղաղապահ ուժերը: