ԱՄՆ Ներկայացուցիչների պալատի խոսնակ Նենսի Փելոսիի հետ հանդիպմանը Հայաստանի ընդդիմությունից որևէ մեկը ներկայացված չէր, ինչը Վաշինգտոնում չի կարող դրական դիտվել։ Sputnik Արմենիայի հետ զրույցում ասաց Ամերիկյան հետազոտությունների հայկական կենտրոնի տնօրեն Սուրեն Սարգսյանը։
«Եթե դու ժողովրդավար պետություն ես, եթե դու հարգում ես մարդու իրավունքները, ժողովրդավարությունը, ժողովրդավարության սկզբունքները և երկկուսակցական կամ բազմակուսակցական համակարգը, որը ժողովրդավարության կարևոր արժեքներից է, այդ դեպքում ճիշտ կլիներ, որ Հայաստանի ընդդիմությունից որևէ մեկը ներկայացված լիներ այդ հանդիպմանը»,- նշեց նա։
Սարգսյանը կարծում է, որ թեև հանդիպման համար 3 տեղ էր հատկացված, սակայն Հայաստանի պատվիրակության ղեկավար ԱԺ խոսնակ Ալեն Սիմոնյանը դրանք կարող էր այնպես բաշխել, որ ընդդիմադիր թևից էլ մի ներկայացուցիչ ներկա լիներ կամ գոնե բանակցեր ևս մեկ հոգի ներգրավելու համար և առաջնահերթությունը տար ՀՀ ընդդիմադիր ներկայացուցչին, իսկ, օրինակ, ՀՀ-ում ԱՄՆ դեսպան Լիլիթ Մակունցը կարող էր հանդիպման ժամանակ երկրորդ շարքում նստել։
«Առաջնահերթությունը պետք էր տալ պետական շահերին, պետական մոտեցմանը և Վաշինգտոնում ճիշտ ընկալվելու հնարավորությանը։ Ցավոք, այդպես չի արվել, և դեսպանը որոշել է, որ ավելի լավ է` ինքը մասնակցի հանդիպմանը, քան Հայաստանի ընդդիմադիր դաշտից որևէ գործիչ»,- հավելեց Սարգսյանը։
Հիշեցնենք, որ հունվարի 19-ին Հայաստանի Հանրապետության Ազգային ժողովի նախագահ Ալեն Սիմոնյանը հանդիպել է Ամերիկայի Միացյալ Նահանգների Ներկայացուցիչների պալատի խոսնակ Նենսի Փելոսիի հետ:
Հայկական կողմից պատվիրակության կազմում ներառվել են ԱԺ նախագահ Ալեն Սիմոնյանը, «Քաղաքացիական պայմանագիր» խմբակցության ղեկավար Հայկ Կոնջորյանը և ԱՄՆ-ում ՀՀ արտակարգ և լիազոր դեսպան Լիլիթ Մակունցը։
Պատվիրակության կազմում նախապես ներառված էր նաև ՀՀ ԱԺ «Պատիվ ունեմ» խմբակցության ղեկավար Արթուր Վանեցյանը։ Նա ԱՄՆ մեկնելուց ժամեր առաջ տեղեկացել էր, որ ԱՄՆ Ներկայացուցիչների պալատի խոսնակ Նենսի Փելոսիի հետ հանդիպմանը հայկական կողմից մասնակցելու են երեք հոգի, և որոշում է կայացվել Վանեցյանին չներառել այդ կազմում։