ԵՐԵՎԱՆ, 20 հունվարի – Sputnik. Մի քանի տասնյակ բեռնատարներ Ռուսաստանի կողմից կուտակվել են «Վերին Լարս» տանող անցակետի ճանապարհին, բայց իրավիճակը ծայրահեղ չէ։ Տեղեկությունը Sputnik Արմենիային հայտնեց Ռուսաստանում Հայաստանի դեսպանատանը կից մաքսային կցորդ Արամ Թանանյանը։
Ավելի վաղ հայտնի էր դարձել, որ սահմանին ավելի քան 50 բեռնատար է արգելափակվել։
«Երեկ երեկոյան Խաչի լեռնանցքի մերձակայքում ճանապարհը եղանակային վատ պայմանների պատճառով փակվել էր, այդ պատճառով Ռուսաստանից Վրաստան թույլ են տալիս երթևեկել միայն թեթև մարդատար ավտոմեքենաներին», – ասաց Թանանյանը։
Նրա խոսքով` ներկա պահին եղանակը պարզվել է։ Թանանյանը չի բացառում, որ մաքրման աշխատանքներից հետո ճանապարհը կբացվի նաև բեռնատարների համար։ Բանն այն է, որ Գուդաուրի–Կոբի ճանապարհահատվածում ձնահոսքի վտանգ կա ցերեկային ժամերին, այդ պատճառով երթևեկությունը հիմնականում ապահովվում է երեկոյան և գիշերային ժամերին։
Հիշեցնենք, որ ռազմավիրական ճանապարհը ներկա պահին Հայաստանն ու Ռուսաստանը կապող միակ ցամաքային ուղին է։
Վրաստանի իշխանությունները շինարարական աշխատանքներ են տանում Մցխեթ–Ստեփանծմինդա–Լարս ավտոմայրուղու Կոբի–Գուդաուրի հատվածի ամենաբարդ ու վտանգավոր Քվեշեթի–Կոբի շրջանցիկ ճանապարհը կառուցելու համար։ Նախնական տվյալներով` նախագիծն ավարտին կհասցվի 2024 թվականին։
Նախատեսվում է 22,7 կմ երկարությամբ ճանապարհ կառուցել, ինչպես նաև 6 կամուրջ և 5 թունել, այդ թվում` 9 կիլոմետրանոց թունել Խաչի լեռնանցքի տակ։ Նախագիծը Եվրոպայում ամենաբարդ ինժեներական կառույցներից մեկն է համարվում։