ԵՐԵՎԱՆ, 19 հունվարի – Sputnik. Կաշառք ստանալու կասկածանքով ձերբակալվել է երկու պաշտոնատար անձ: Տեղեկությունը հայտնում է ՀՀ հակակոռուպցիոն կոմիտեն։
«Նախնական համաձայնությամբ խոշոր չափերով կաշառք ստանալու կասկածանքով ձերբակալվել են ՀՀ քաղաքաշինության, տեխնիկական և հրդեհային անվտանգության տեսչական մարմնի տարածքային բաժիններից մեկի պետի տեղակալ Պ. Ե.-ն ու նույն բաժնի գլխավոր մասնագետ Ա. Գ.-ն»,– նշված է հաղորդագրության մեջ:
ՀՀ հակակոռուպցիոն կոմիտեում քննվող քրեական գործով ձեռք բերված փաստական տվյալների համաձայն` Պ. Ե.-ն ու Ա. Գ.-ն 2021թ. հոկտեմբերի 21-ին 1000 դոլար կաշառք են ստացել Կոտայքի մարզում գտնվող բենզալցակայաններից մեկի սեփականատիրոջից։
Գումարը վերցրել են, որպեսզի չարձանագրեն բենզալցակայանն առանց համապատասխան թույլտվության վերանորոգելու, արդիականացնելու և շինարարական այլ աշխատանքներ իրականացնելու փաստը։