ԵՐԵՎԱՆ, 19 հունվարի - Sputnik. Երևանի ու Անկարայի միջև հարաբերությունների կարգավորման գործընթացը, ինչպես նաև Մոսկվայում կայացած հատուկ ներկայացուցիչների առաջին հանդիպման արդյունքները կքննարկվեն Թուրքիայի կառավարության նիստում: Տեղեկությունը հայտնում է Hurriyet-ը։
Նշվում է, որ կառավարության նիստը տեղի կունենա Թուրքիայի նախագահ Ռեջեփ Թայիփ Էրդողանի նախագահությամբ:
«Կառավարության նիստում կքննարկվի ահաբեկչության դեմ պայքարը։ Կգնահատվեն նաև դիվանագիտության ոլորտում ունեցած ձեռքբերումները։ Անցյալ շաբաթ Թուրքիայի ու Հայաստանի հատուկ ներկայացուցիչները Մոսկվայում հարաբերությունների կարգավորման շուրջ առաջին հանդիպումն անցկացրին: Այդ հանդիպման արդյունքներն ու հետագա գործընթացը կքննարկվեն նիստում», - նշվում է հրապարակման մեջ։
Հիշեցնենք` Հայաստանի և Թուրքիայի միջև դիվանագիտական հարաբերություններ չկան. 2009 թվականին Ցյուրիխում երկու երկրների արտգործնախարարները դիվանագիտական հարաբերություններ հաստատելու մասին արձանագրություններ ստորագրեցին, սակայն այդ փաստաթղթերն այդպես էլ չվավերացվեցին։
Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորմանն ուղղված հստակ քայլեր ձեռնարկել և երկուստեք հատուկ ներկայացուցիչներ նշանակեցին. Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Հունվարի 14-ին Հայաստանի և Թուրքիայի հատուկ ներկայացուցիչները հանդիպեցին Մոսկվայում։
Ավելի ուշ ԱԳՆ–ն հայտարարեց, որ կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների։