ԵՐԵՎԱՆ, 19 հունվարի – Sputnik. Վրաստանն այսօր թարմացրել է կորոնավիրուսով վարակման իր օրական հակառեկորդը` 7521 նոր դեպք, հայտնում է Վրաստանի առողջապահության նախարարությունը։
«Համավարակի սկզբից սա առավելագույն ցուցանիշն է» – լրագրողներին ասել է առողջապահության նախարարության ներկայացուցիչը։
Գերատեսչության կայքում նշված է, որ մեկ օրվա ընթացքում 31 մարդ է մահացել, առողջացել են 3160–ը։ Համավարակի բռնկման ամենասկզբից գրանցված դեպքերի ընդհանուր թիվը Վրաստանում գերազանցել է 1 միլիոնը։
Հիվանդությունների վերահսկման ազգային կենտրոնի ղեկավար Ամիրան Գամկրելիձեն այսօր հրավիրված ճեպազրույցի ժամանակ հայտնել է, որ վարակման դեպքերի կեսից ավելիի մանրէահիմքը «Օմիկրոնն» է։
Միևնույն ժամանակ առողջապահության նախարարությունում կարծում են, որ ամեն ինչ այդ աստիճան վատ չէ և հիվանդանոցային հատվածի վրա ճնշում չկա։
«Այսօր ավելի քան 7 հազար դեպք է գրանցվել, ինչը պայմանավորված է շաբաթ և կիրակի օրերին քիչ թվով թեստեր անցկացնելու հետ», – ասել է առողջապահության փոխնախարար Թամար Գաբունիան։
Սակայն երկրում արդեն իսկ հայտարարել են COVID-19–ի վեցերորդ ալիքի մասին։