ՀԾԿՀ–ն մտադիր է թույլատրել «Ռոստելեկոմի» վաճառքը. նախարարությունն ու ԱԱԾ–ն դեմ չեն

ԵՐԵՎԱՆ, 17 հունվարի - Sputnik. Հայաստանի հանրային ծառայությունները կարգավորող հանձնաժողովը (ՀԾԿՀ) դեմ չէ հայաստանյան հեռահաղորդակցության կապի օպերատոր «Ռոստելեկոմ» ընկերության վաճառքին։

Հանձնաժողովի վերջնական որոշումը գործարքը թույլատրելու մասին նախատեսվում է ընդունել հունվարի 19-ի նիստում։ Իսկ առայժմ հանձնաժողովի կայքում հրապարակվել է որոշման նախագիծը, որում մասնավորապես ասվում է, որ գործարքին համաձայնություն տալու հարցը քննարկվել է ՀՀ բարձր տեխնոլոգիական արդյունաբերության նախարարության հետ։

Նախարարությունն էլ իր հերթին հարցը քննարկել է ԱԱԾ–ի հետ, որի արդյունքում հանձնաժողովին հայտնել է, որ «չի առարկում» բաժնետոմսերի 100 տոկոսի վաճառքին։

Այն, որ հայաստանյան «Ռոստելեկոմն» առաջիկայում նոր սեփականատեր է ունենալու, հայտնի էր դարձել շուրջ 2 ամիս առաջ` 2021թ–ի նեյեմբերին։ Կապի օպերոտորի ձեռքբերման հայտ էր ներկայացրել Կիպրոսում գրանցված Molitro Holdings Limited ընկերությունը։

ՀԾԿՀ–ի որոշման նախագծում նշվում է, որ 2021թ–ի հոկտեմբերի 19-ին հանձնաժողով է դիմել «Ռոստելեկոմի» ռուսաստանյան բաժնետեր «Ջիէնսի-Ալֆա» ՓԲԸ-ն` հայտնելով, որ ՌԴ քաղաքացի, ֆիզիկական անձ Արման Ունանյանը և ՀԷՑ–ը նախատեսում են Կիպրոսում գրանցել նոր ընկերություն` Molitro Holdings Limited, որը ձեռք կբերի «Ռոստելեկոմի» հայաստանյան դուստր ձեռնարկության միակ բաժնետեր Filor Ventures Limited ընկերության 100 տոկոս բաժնեմասը։

Գործարքի արժեքը ՀԾԿՀ–ն չի հրապարակում, սակայն դեկտեմբերին «Ռոստելեկոմի» ղեկավար Միխայիլ Օսեևսկին լրագրողներին հայտնել էր, որ վաճառվող ակտիվների նախնական արժեքը 25 մլն դոլար է։

Հիշեցնենք` 2012 թվականի փետրվարին «Ռոստելեկոմը» դարձավ GNC Alfa–ի գլխավոր բաժնետերը` 22,5 մլն դոլարով ձեռք բերելով ընկերության 75%–ը`հանած մեկ բաժնետոմս, ինչպես նաև օպցիոն ստացավ ձեռք բերելու մնացած 25%–ը գումարած մեկ բաժնետոմս։ 2019 թվականի օգոստոսին «Ռոստելեկոմն» օգտվեց այդ օպցիոնից և ձեռք բերեց մնացած բաժնետոմսերը։

Նկատենք, որ այն ժամանակ GNC Alfa–ն մեծ ներդրումային ծրագիր էր իրականացնում միջազգային օպտիկական մալուխների անցկացման ոլորտում, ինչը թույլ տվեց մի քանի անգամ ավելացնել երկրում միջազգային ինտերնետային թրաֆիկի թողունակությունը։

Այն ժամանակ GNC Alfa–ն մանրածախ ծառայություններ չէր մատուցում և թրաֆիկը վաճառում էր միայն տեղական ինտերնետ–մատակարարներին։ Ընկերությունն ու դրա օպտիկա–մանրաթելային ցանցը ձեռք բերելուց հետո «Ռոստելեկոմը» Հայաստանում ինտերնետ և IP–հեռուստատեսություն էր առաջարկում նաև վերջնական սպառողին։

Ավելի վաղ վաճառքի մասին տեղեկությունները Sputnik Արմենիայի հետ զրույցում հաստատել էր GNC Alfa–ի գլխավոր տնօրեն Հայկ Ֆարամազյանը։ Նա չէր բացահայտելհավանական գնորդին։