ԵՐԵՎԱՆ, 15 հունվարի – Sputnik. Բերանի մշտական չորությունը, ծարավն ու զուգարան գնալու հաճախակի ցանկությունը կարող են արյան մեջ գլյուկոզայի բարձր մակարդակի մասին հայտնող ազդանշաններ լինել։ Սովորաբար նման ախտանշաններ նկատվում են 1-ին և 2-րդ տիպի դիաբետով բուժառուների մոտ։
Բացի այդ, The London Diabetes Centre կայքի տվյալներով՝ շաքարի բարձր մակարդակ ունեցող բուժառուներն ավելի հակված են բերանի սնկային ինֆեկցիաների։ Նրանց մոտ կարող է առաջանալ բերանի խոռոչի կանդիդոզ՝ կաթնախտ, որը բնութագրվում է լեզվի վրա սպիտակ նստվածքով։
Վտանգավոր հիվանդության մասին կարող է ահազանգել նաև մաշկը։ Այսպես, մաշկի մակերևույթին փոքրիկ կարմիր անհարթությունները, որոնք բշտիկների են նման, կարող են դիաբետի զարգացման նշան լինել։ Ժամանակի ընթացքում այդ գոյացությունները վերածվում են դեղին, կարմիր կամ նույնիսկ շագանակագույն օվալաձև բծերի։
Որպես կանոն՝ նմանատիպ ցան նկատվում է սրունքի շրջանում, ընդ որում՝ այդ հատվածի մաշկը կարող է կոպտանալ կամ ուռել։