Ադրբեջանի բարձրագույն իշխանությունն արդեն ուղղակիորեն թիրախավորում է որոշ կարևորագույն միջազգային կառույցներ, որոնց անմիջական ներգրավմամբ, մասնավորապես ԵԱՀԿ Մինսկի խմբի համանախագահող ՌԴ խաղաղապահ առաքելության շնորհիվ պահպանվում է կայունությունն ու խաղաղությունը մեր տարածաշրջանում, Sputnik Արմենիայի հետ զրույցում ասաց ԱՀ արտգործնախարար Դավիթ Բաբայանը։
«Բացի նրանից, որ Ադրբեջանի կողմից պարբերաբար ապակառուցողական, ահաբեկչական ու ծավալապաշտական գաղափարներ են հնչում, հիմա տեսնում ենք, որ ադրբեջանական կողմն ուղղակիորեն հարվածում է ԵԱՀԿ Մինսկի խմբի համանախագահությանը` կասկածի տակ դնելով այդ կառույցի աշխատանքն ու ընդհանրապես նրա գոյությունը, ինչպես նաև նենգորեն հարվածում է ՌԴ խաղապահ առաքելությանը։ Բնականաբար այդ ամենն ուղղված է տարածաշրջանում Ադրբեջանի ծավալապաշտական ծրագրերի իրականացմանը»,– ասաց արտգործնախարարը։
Ադրբեջանը գործում է Թուրքիայի աջակցությամբ, ու Արցախի ԱԳՆ-ն նրանց համատեղ քայլերը գնահատում է որպես ծայրաստիճան ապակառուցողական, որոնք տարածաշրջանի կայունության ու խաղաղության համար ներկայացնում են լուրջ վտանգներ։
«Մեր կարծիքով` ԵԱՀԿ–ն պետք է դիմի գործուն քայլերի, որպեսզի շոշափելիորեն զսպի Ադրբեջանի վարքագիծը։ Ադրբեջանը տեսնում է, որ կան որոշակի բարդություններ Արևմուտք–Ռուսաստան փոխհարաբերություններում, ուստի նենգաբար փորձում է օգտվել այդ հանգամանքից` առաջ տանելով իր շահերը»,– ասաց Բաբայանը։
Բաբայանի կարծիքով՝ հարվածելով Մինսկի խմբին` Բաքուն փաստորեն հարված է հասցնում հատկապես համանախագահող Ռուսաստանի խաղաղապահ առաքելությանը` ակնկալելով, որ եթե համանախագահությունն այլևս չգործի, ապա անիմաստ կդառնա նաև ռուսական խաղաղապահ զորախմբի ներկայությունը Լեռնային Ղարաբաղում։
ԱՀ արտգործնախարարի պնդմամբ` միջազգային հանրությունը չպետք է հանդուրժի նման պահվածքը, քանի որ Ադրբեջանն արդեն դիմում է «նենգ ու կեղտոտ ինտրիգների»։
Նշենք, որ անդրադառնալով ղարաբաղյան հարցին՝ Ալիևն օրեր առաջ հայտարարել էր, թե Բաքուն կշարունակի խափանել դրանով զբաղվելու՝ ԵԱՀԿ Մինսկի խմբի փորձերը։ «Ես տեղյակ չեմ՝ ինչով է զբաղվում Մինսկի խումբը։ Երևի պատրաստվում են հոբելյանական միջոցառումների», - ասել է Ադրբեջանի նախագահը՝ հիշեցնելով, որ առաքելությունը ձևավորվել է 1992-ին, և այս տարի լրանում է դրա 30-ամյակը։
«Երևի դրանով են զբաղված։ Սակայն եթե կատակը մի կողմ թողենք, կարծում եմ՝ նրանք իրենք պետք է իրենց օրակարգը ձևավորեն», - հայտարարել է Ալիևը՝ միաժամանակ հավելելով, որ ԵԱՀԿ Մինսկի խմբի համանախագահները չպետք է զբաղվեն ղարաբաղյան խնդրով, քանի որ այն լուծված է և Ադրբեջանը նրանց փոխարեն այն լուծել է։