ԵՐԵՎԱՆ, 13 հունվարի - Sputnik. Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Ղազախստանի նախագահ Կասիմ-Ժոմարտ Տոկաևի հետ։ Տեղեկությունը հայտնում է Կրեմլի պաշտոնական կայքը։
Տոկաևը տեղեկացրել է երկրում կարգուկանոնի լիակատար հաստատման համար ձեռնարկվող քայլերի մասին՝ ՀԱՊԿ խաղաղապահ հավաքական ուժերի արդյունավետ գործողություններին զուգահեռ։
Հաղորդագրությունում նշվում է, որ Տոկաևը հատուկ շնորհակալություն է հայտնել Ռուսաստանին՝ Ղազախստանի ռազմավարական գործընկերոջն ու ՀԱՊԿ-ի գծով դաշնակցին։
Քննարկվել են ՀԱՊԿ երկրների անձնակազմերին երկրից դուրս բերելու մեկնարկի հետ կապված հարցեր։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ Ժոմարտ-Տոկաևը ստորագրել էր երկրի կառավարության հրաժարականի մասին հրամանագիրը։
Նույն օրը Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։
Հայտարարվել է, որ ՀԱՊԿ խաղաղապահ զորակազմի դուրսբերումը Ղազախստանից կսկսվի հունվարի 13-ին: