ԵՐԵՎԱՆ, 12 հունվարի – Sputnik. Հայաստանում խաղաղության բացակայությունը ձեռնտու է եղել այն մարդկանց, որոնք կոռուպցիոն համակարգ են ստեղծել ու կայացրել։ Այսօր լրագրողների հետ ճեպազրույցում ասաց ՀՀ էկոնոմիկայի նախարար Վահան Քերոբյանը` մեկնաբանելով «խաղաղության դարաշրջան» բացելու մասին Նիկոլ Փաշինյանի հայտարարությունը։
«Այդ մարդկանց ձեռնտու է եղել խաղաղության բացակայությունը, որովհետև դա է եղել իրենց իշխանության հենարանը։ Եվ այդ երկուսի արդյունքում մենք տեսնում ենք, թե ինչպիսի հյուծված ենթակառուցվածքներ, մարդկային կապիտալ մենք ունենք, որի վրա պետք է անգամներով ավելի շատ ներդրումներ անենք` որպես երկիր մրցունակ դաշտ վերադառնալու համար»,– ասաց Քերոբյանը։
Ցավակցելով հունվարի 11-ին ադրբեջանական սադրիչ գործողությունների հետևանքով ՀՀ սահմանները պաշտպանելիս զոհված զինծառայողների ընտանիքներին` Քերոբյանը միաժամանակ հիշեցրեց, որ նման միջադեպեր անընդհատ եղել են նախորդ 30 տարիներին։
«Կառավարությունն ամեն ինչ անում է, որպեսզի խաղաղություն լինի Հայաստանի համար ընդունելի պայմաններով, որպեսզի մենք կարողանանք մտածել երկարաժամկետ աշխատանքի մասին։ Այսօր ցանկացած ներդրող բավական կարճաժամկետ է մտածում։ 10 տարվա նախագծեր շատ քիչ կան, որ ներդրում անեն 10 տարի հետո արժեք տանալու համար»,– ասաց նախարարը` հավելելով, որ խաղաղությունն ունի շատ մեծ գին։
Այդ գինը, նրա խոսքով, այն խնդիրներն են, որոնք այսօր կան գրեթե բոլոր ոլորտներում։ Խաղաղության բացակայությունը թույլ չի տվել, որ երկիրը զարգանա այնպես, ինչպես խաղաղության մեջ ապրող մրցակից երկրները։
Հիշեցնենք` երեկ ՊՆ–ն հայտնեց, որ Ադրբեջանի ԶՈւ–ն ժամը 15։15-ի սահմանում կրակ է բացել Վերին Շորժայի հատվածում։ Ավելի ուշ հայտնի դարձավ, որ ադրբեջանցիները կիրառել են հրետանի և ԱԹՍ, հայկական կողմն ունի 2 զոհ և 2 վիրավոր։ Այսօր ՊՆ–ն տեղեկացրեց, որ հայկական կողմը ևս մեկ զոհ ունի։