Խանութներում արհեստական հավելումներով պատրաստված կաթնամթերքն ու բնական կաթնամթերքն առանձին դարակաշարերում ցուցադրելու օրենքի նախագիծը սպառման ծավալների էական փոփոխության չի բերի։ Sputnik Արմենիայի հետ զրույցում այս մասին ասաց Հայաստանի պանրագործների միության ղեկավար Արմեն Գիգոյանը։
Այդուհանդերձ, պանրագործների միության նախագահը օրենսդրական այս փոփոխությունը կարևոր քայլ է համարում։
«Սպառողը պետք է իմանա` բնական հումքով պատրաստված կաթնամթերք է գնում, թե արհեստական հավելումներով պատրաստված, և, եթե հաճախորդի համար առանձնացված չի լինում, ինքը սկսում է շփոթեցնել։ Թեպետ անգամ այս դեպքում մարդիկ շարունակելու են զուտ գնով առաջնորդվել, քանի որ արհեստական հավելումներով պատրաստված մթերքի ինքնարժեքը բնականից էժան է»,- ասաց նա։
Գիգոյանի խոսքով` բնական հումքով արտադրվող կաթնամթերքին առավելություն չտալով` սպառողները նպաստում են տեղական կաթի արտադրության ծավալների նվազմանը և անարատ կաթը հայտնվում է անարդար մրցակցային պայմաններում։
Իսկ օրգանիզմի համար արհեստական հավելումներով պատրաստված կաթնամթերքի հետևանքների մասին պանրագործների միության ղեկավարը նախընտրում է լռել։
«Շատ դեպքերում խնդիրը ոչ թե ինչպիսի ուտելիք ձեռք բերելու մեջ է, այլ զուտ ուտելիք ձեռք բերելու»,- ասաց Գիգոյանը։
Նշենք, որ ՀՀ ազգային ժողովի տնտեսական հարցերի մշտական հանձնաժողովն այսօր` հունվարի 12–ին, հավանություն տվեց կառավարության ներկայացրած օրենքի նախագծին, որով առաջարկվում է խանութներում արհեստական հավելումներով կաթնամթերքն առանձնացնել բնական կաթնամթերքի դարակաշարից։