ԵՐԵՎԱՆ, 11 հունվարի – Sputnik. Իրանը դարձել է այն սակավաթիվ երկրներից, որտեղ մշակվել են կորոնավիրուսի «Օմիկրոն» շտամի արագ հայտնաբերման համար նախատեսված նոր տարբերակներ։
Այս մասին իրանական IRNA լրատվական գործակալությանը տված հարցազրույցում ասել է «Բարաքաթ» էլեկտրոնային բժշկության գիտանախաձեռնող ընկերության գլխավոր տնօրեն Սաջադ Մորավեջին։
«Ներկայում այդ մեթոդները նախատեսված են կորոնավիրուսի նոր շտամների հայտնաբերման համար, այնպես որ ապագայում բռնկման դեպքում հնարավոր կլինի բացահայտել կորոնավիրուսի այլ շտամներ ևս»,– նշել է Մորավեջին։
Նա պարզաբանել է, որ այդ փաթեթների օգնությամբ կորոնավիրուսի նոր շտամը կարելի է նույնականացնել 15 րոպեում՝ թեստից հետո պետք է հավաքել շտրիխ կոդը, հիվանդի ազգային կոդը, նմուշի ազգային կոդը, ինչպես նաև նմուշ վերցնելու ամսաթիվն ու վայրը, որոնք ներմուծվում են թվային համակարգ, ինչը թույլ է տալիս հետևել այն մարդկանց, ովքեր կապ են ունեցել վարակվածների հետ:
«Բարաքաթ» ընկերության գլխավոր տնօրենը հիշեցրել է, որ «Օմիկրոնի» արագ ախտորոշման համար նախատեսված հավաքածուն արտադրվել է իրանցի հետազոտողների կողմից։ Նա ընդգծել է, որ իրանական տեխնոլոգիական արտադրանքն արդեն մտել է ներքին շուկա և ակտիվորեն շահագործվում է:
Մորավեջին նաև շեշտել է, որ ախտորոշման այդ փաթեթն ունի 92% ճշգրտություն և 98% զգայունություն, ինչը վկայում է իրանական արտադրանքի շատ բարձր որակի մասին:
Նրա խոսքով՝ ընկերության արտադրողականությունն այժմ կազմում է օրական մոտ 200 հազար փաթեթ, սակայն, եթե պահանջվի, այդ ամենը կարող է ավելանալ:
Հիշեցնենք, որ հունվարի 8–ին պարզ դարձավ, որ Հայաստանում «Օմիկրոն» շտամով վարակված 2 քաղաքացի կա։ Նրանք հիվանդությունը թեթև են տանում և բուժում ստանում են տնային պայմաններում։ «Օմիկրոն» շտամով վարակված անձանցից մեկը ԱՄՆ-ից է Մոսկվայով ժամանել է Հայաստան, իսկ մյուսը` Եգիպտոսից։