ԵՐԵՎԱՆ, 11 հունվարի – Sputnik. Հայաստանը Ամերիկայի Միացյալ Նահանգներին է փոխանցել հետախուզման մեջ գտնվող մի քաղաքացու։ Տեղեկությունը հայտնում է Հայաստանում ԱՄՆ դեսպանությունը։
Ինտերպոլի կողմից միջազգային հետախուզում հայտարարելուց հետո ՀՀ ոստիկանությունը ԱՄՆ քաղաքացուն 2021թ․ օգոստոսին ձերբակալել էր Երևանում։ Հետաքննությունների դաշնային բյուրոն այդ անձին հետախուզում էր երեխայի նկատմամբ սեռական բռնության մեղադրանքով։
«Մենք բարձր ենք գնահատում ՀՀ գլխավոր դատախազության և ՀՀ իրավապահների հետ մեր համագործակցությունը, որը թույլ տվեց ձերբակալել և ԱՄՆ-ին փոխանցել հիշյալ անձին։ Արդեն 5-րդ անգամ է, երբ աշխատելով մեր հայ գործընկերների հետ` հետախուզման մեջ գտնվող անձինք վերադարձվում են ԱՄՆ՝ պատասխանատվության ենթարկվելու իրենց գործած հանցանքների համար», - ասել է ՀՀ-ում ԱՄՆ դեսպան Լին Թրեյսին։
Հետախուզվողն ԱՄՆ-ում կկանգնի դատարանի առաջ։