ԵՐԵՎԱՆ, 11 հունվարի - Sputnik. Հայ խաղաղապահները պահպանում են Ալմաթիի հացի գործարանը, որը հաց է մատակարարում ամբողջ քաղաքին։ Տեղեկությունը հայտնում է RT-ն:
«Քանի դեռ բելառուսական խաղաղապահները ծառայություն են իրականացնում ավիաբազայում, իսկ ղրղըզները` Ալմաթիի ՋԷԿ–ում, հայերին բաժին է հասել... հացի գործարանի պաշտպանությունը։ Իրականում սա կարևոր նշանակություն ունեցող օբյեկտ է, որովհետև այստեղ է թխվում ամբողջ հացը, որը մատակարարվում է քաղաքին։ Ով ոչ միայն հաց է թխվում, այլև բուլկի, քաղցրավենիք և այլն», - գրել է RT-ի թղթակիցը։
Նրա խոսքով՝ անկարգությունների պատճառով աշխատակիցներին հրահանգվել էր թաքնվել տանը, քաղաքում կարող էր հացի պակաս լինել, բայց իրավիճակը կայունացել է։
«Աքսայը» Ղազախստանի Հանրապետությունում հաց արտադրող ամենախոշոր ձեռնարկություններից մեկն է: Գործարանն օրական ավելի քան 150 տոննա արտադրանք է տալիս և ավելի քան 1000 աշխատակից ունի։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ Ժոմարտ –Տոկաևը ստորագրել էր երկրի կառավարության հրաժարականի մասին հրամանագիրը։
Նույն օրը Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։