ԵՐԵՎԱՆ, 10 հունվարի – Sputnik. Վաշինգտոնն ուզում է վերականգնել Ռուսաստան–ՆԱՏՕ խորհրդի աշխատանքը Մոսկվայի համար անընդունելի պայմաններով։ Ժնևում ԱՄՆ պատվիրակության հետ կայանալիք հանդիպումից առաջ ՌԻԱ Նովոստիի հետ զրույցում այս մասին հայտարարել է ՌԴ փոխարտգործնախարար Սերգեյ Ռյաբկովը։
«Նրանք ուզում ենք վերականգնել Ռուսաստան–ՆԱՏՕ խորհրդի գործունեությունը, բայց իրենց պայմաններով` այնպիսի օրակարգով, որը հարմար է իրենց` շեշտը դնելով, այսպես կոչված, դեէսկալացիայի, Ուկրաինայում, այսպես կոչված, «ռուսական ագրեսիայի» վրա», – հայտարարել է Ռյաբկովը։
«Մեզ համար դա անընդունելի է», – ընդգծել է ՌԴ փոխարտգործնախարարը։
Ուկրաինայի շուրջ ստեղծված էսկալացիայի վերաբերյալ Արևմուտքի կողմից վերջերս հնչող մեղադրանքներին ի պատասխան ՌԴ–ն բազմիցս հայտարարել է, որ որևէ մեկի վրա հարձակվելու մտադրություն չունի։
Ժնևում երեկ երեկոյան ընթրիքի ձևաչափով անցկացվեց ռուսական և ամերիկյան պատվիրակությունների առաջին հանդիպումը։ Անվտանգության երաշխիքների վերաբերյալ «նախնական» այս բանակցությունների արդյունքներն ամփոփելիս Ռյաբկովը հայտարարել է, որ բարդ, բայց գործնական զրույց է եղել։
Քննարկումների հիմնական մասն այսօր փակ ձևաչափով կկայանա ՄԱԿ–ի ժնևյան բաժանմունքին կից գործող ԱՄՆ մշտական ներկայացուցչության տարածքում։