ԵՐԵՎԱՆ, 10 հունվարի – Sputnik. Տարօրինակ է ԱՄՆ–ից լսել, որ իրենք չեն հասկանում` ինչ է տեղի ունենում Ղազախստանում։ Այս մասին ռուսական առաջին ալիքի «Ժամանակը ցույց կտա» հաղորդման եթերում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, նրա խոսքերը մեջբերում է ՌԻԱ Նովոստին։
«Թեպետ, իհարկե, տարօրինակ էր լսել, օրինակ, ԱՄՆ պետքարտուղարից կամ Սպիտակ տան պաշտոնական ներկայացուցչից այն մասին, որ իրենք չեն հասկանում` ինչ է կատարվում Ղազախստանում, և չեն հասկանում` ինչու է Ղազախստանն այդպիսի որոշումներ կայացրել։ Դա զարմանալի է, սովորաբար իրենք միշտ ամեն ինչ հասկանում են», – ասել է Զախարովան։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ-Ժոմարտ Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։