Երևանի Սուրբ Գրիգոր Լուսավորիչ եկեղեցում Հիսուս Քրիստոսի Սուրբծննդյան և Աստվածհայտնության տոնի առիթով Ամենայն հայոց կաթողիկոս Գարեգին Երկրորդը Հայրապետական պատարագ է մատուցել։
Սուրբ պատարագին որպես առընթերականեր սպասավորել են Մայր Աթոռի լուսարարապետ և վանական խորհրդի ատենապետ գերաշնորհ Տ. Մուշեղ եպիսկոպոս Բաբայանն ու ԵՊՀ Աստվածաբանության ֆակուլտետի դեկան և Երևանի Սուրբ Գրիգոր Լուսավորիչ մայր եկեղեցու հոգևոր տեսուչ, գերաշնորհ Տ. Անուշավան եպիսկոպոս Ժամկոչյանը։
Պատարագի ավարտին կատարվել է Ջրօրհնեք, որի ընթացքում Ամենայն հայոց կաթողիկոսը խաչով և սրբալույս մյուռոնով օրհնել է ջուրը: Խաչի այս տարվա կնքահայրն էր հայ երգիչ, երգահան, ՀՀ վաստակավոր արտիստ Դավիթ Ամալյանը։
Ջրօրհնեքի արարողության վերջում Վեհափառը պատգամ է հղել հայ ժողովրդին: