ԵՐԵՎԱՆ, 31 դեկտեմբերի – Sputnik. Վրաստանի նախկին նախագահ Միխեիլ Սաակաշվիլին բանտից, որտեղ նա պետք է 6 տարի անցկացնի, ժողովրդին ուղղված իր նախատոնական ուղերձում առաջին անգամ պատմել է այն մասին, որ արտաամուսնական դուստր ունի։ Այս մասին գրում է Sputnik Վրաստանը:
Սա առաջին տարին է, երբ հեռուստաէկրաններից իր մայրիկի հետ կողջունի մեզ «Մտավարի արխի» Ամանորյա համերգի ամենափոքր մասնակից Էլիս Մարիա Սաակաշվիլին։ Իմ ամենասիրելի աղջիկն է, ամենակրտսեր երեխաս»,- ասված է Սաակաշվիլիի Facebook-ի էջում տեղադրված հաղորդագրության մեջ։
Նախկին նախագահը գրառմանը կից լուսանկար է հրապարակել, որտեղ երևում են վրացի հայտնի երգչուհի Սոֆո Նիժարաձեն և երեխան։ Վրաստանում տարիներ շարունակ լուրեր էին շրջանառվում, որ Սաակաշվիլին և Նիժարաձեն սիրավեպ են ունեցել։ Ավելի ուշ սկսեցին խոսել, որ նրանք համատեղ երեխա ունեն։
«Այս նոր տարին ինձ համար առանձնահատուկ է ոչ թե բանտային պատերով, այլ իմ սիրելի աղջկա հեռուստատեսային դեբյուտով»,– գրել է Սաակաշվիլին:
Ներկայում Վրաստանի նախկին նախագահի ընտրյալը Ուկրաինայի Գերագույն ռադայի պատգամավոր Ելիզավետա Յասկոն է: Այս մասին լայն հանրությանը հայտնի է դարձել Սաակաշվիլիի ձերբակալության օրը, երբ Յասկոն Facebook-ում տեսանյութ էր հրապարակել։
Արդյոք Սաակաշվիլին պաշտոնապես բաժանվել է Սանդրա Ռուլոֆսից, որի հետ երկար տարիներ ամուսնացած էր, հայտնի չէ։
Իր հերթին Վրաստանի նախկին առաջին տիկինը հայտարարել է, որ Յասկոյի հետ Սաակաշվիլիի հրապարակած տեսանյութն իր համար անակնկալ էր։
Ռուլոֆսի հետ ամուսնությունից Սաակաշվիլին ունի երկու որդի ՝ Էդուարդ (ծնվել է 1995 թ.) և Նիկոլոզ (ծնվել է 2005 թ.)։
Սահակաշվիլիին ձերբակալել են Թբիլիսիում ընթացիկ տարվա հոկտեմբերի 1-ին՝ հեռակա կարգով երկու դատավճիռների հիման վրա։ Նա դատապարտվել է 6 տարվա ազատազրկման։