ԵՐԵՎԱՆ, 28 դեկտեմբերի – Sputnik. Երևանի քաղաքապետ Հրաչյա Սարգսյանն ավագանու այսօրվա նիստում դիմեց բնակիչներին ու հորդորեց, որ Երևանի բազմաբնակարան շենքերում վերանորոգում իրականացնող բնակիչներն իրենց շինաղբը չլցնեն նկուղները։
Սարգսյանը նշեց, որ բազմաբնակարան շենքերի բնակիչներից շատերը, ամսական 200 դրամ վճարելով, պահանջում են, որ աղբ չլինի, մաքուր լինի, բայց հենց իրենք էլ պետք է պահպանեն այդ մաքրությունը։
«Մեր բնակիչները պետք է, օրինակ, ծխախոտը գետնին չգցեն, շինաղբը նկուղներ չլցնեն։ Ամեն ինչ պետք է իրականացվի համատեղ ուժերով։ Սա գալիս է նաև համատիրության վատ աշխատանքից։ Մենք խնդիր ենք ունենում, ստացվում է, որ համայնքը պետք է գումար ծախսի, որպեսզի գնա, մաքրի այդ շինաղբը»,– ասաց քաղաքապետը։
Երևանում ավելի քան 4500 բազմաբնակարան շենք կա, և, Սարգսյանի խոսքով, չգիտեն` ինչ հերթականությամբ գնան այդ աղբը մաքրելու։
Քաղաքապետը կոչ արեց բնակիչներին, որպեսզի պատշաճ պահեն իրենց շենքերի նկուղները և ոչ միայն. մաքրման աշխատանքները միայն քաղաքապետարանի գործառույթը չէ։
«Մենք աղբահանությունը սուբսիդավորում ենք, բայց միայնակ չենք կարող անել, քանի որ մեկ ձեռքը ծափ չի տալիս, երկուսով է պետք։ Տեսնում եմ, որ լարվածություն ու չարություն կա, բայց այդ ամենը պետք է մի կողմ դնենք։ Մեր ամենօրյա գործողություններով պետք է բարելավումներ իրականացնենք»,– շեշտեց Սարգսյանը։
Նշենք, որ մայրաքաղաքում աղբահանության հարցերով զբաղվում է «Երևանի աղբահանության և սանիտարական մաքրման» հիմնարկը։