ԵՐԵՎԱՆ, 28 դեկտեմբերի – Sputnik. «Մոսկվայի Տուն» մոսկովյան կրթական-մշակութային կենտրոնի (ՄԿՄԿ) նախաձեռնությամբ այսօր` դեկտեմբերի 28-ին, Տավուշի մարզի Իջևան քաղաքում բացվեց 5-րդ կրթական-մշակութային ռուսական կենտրոնը:
Կարմիր ժապավենը կտրեցին Երևանում Մոսկվայի տան գլխավոր տնօրեն Վահրամ Կարապետյանը, «Յունիբանկի» վարչության նախագահ Մեսրոպ Հակոբյանը և Իջևան համայնքի ղեկավար Արթուր Ճաղարյանը:
Կենտրոնի բացմանը ներկա են եղել Գյումրիում Ռուսաստանի գլխավոր հյուպատոս Ռուսլան Կանդաուրովը, Տավուշի մարզպետ Հայկ Ղալումյանը, ՀՀ կրթության, գիտության, մշակույթի և սպորտի նախարարության, Հայաստանում Ռուսաստանի Անվտանգության դաշնային ծառայության Սահմանապահ վարչության ներկայացուցիչներ, ռուսական կազմակերպությունների ղեկավարներ և հյուրեր:
«Ռուսաց լեզուն, իհարկե, պետք է սովորել որպես միջազգային շփման լեզու։ Շատ ուրախ եմ, որ սա Հայաստանում բացված արդեն ոչ առաջին կենտրոնն է։ Կուզենայի շնորհակալություն հայտնել կազմակերպիչներին, որոնք այսքան կարևոր գործով են զբաղվում»,-ողջույնի խոսքում ասաց Գյումրիում Ռուսաստանի գլխավոր հյուպատոս Ռուսլան Կանդաուրովը։
Տավուշի մարզպետ Հայկ Ղալումյանն իր հերթին նշեց, որ կենտրոնը հսկայական ազդեցություն կունենա մարզում ռուսաց լեզվի դասավանդման հարցում։
«Հուսով ենք, որ կենտրոնը հայ-ռուսական մշակութային կապերի նոր էջ կբացի՝ մեր մարզի դպրոցականների և երիտասարդների ակտիվ մասնակցությամբ: Ռուսաց լեզվի ուսուցման հետ միասին երիտասարդ սերունդը կծանոթանա նաև ռուս դասականների ստեղծագործություններին ու ռուսական արվեստին»,- ասաց Ղալումյանը՝ հույս հայտնելով, որ Երևանի Մոսկվայի տան հետ համատեղ նոր նախագծեր կիրականացվեն Տավուշի մարզում:
Նշենք, որ կենտրոնը հագեցած է ժամանակակից սարքավորումներով, ինչը թույլ կտա ինտերակտիվ դասեր և քննարկումներ անցկացնել:
Կենտրոնում ներկայացված է ուսումնական նյութերի լայն ընտրանի, որոնց միջոցով կարելի է տեղեկատվություն ստանալ Ռուսաստանի պատմության և մշակույթի մասին:
«Մենք կարևորում ենք ռուսաց լեզվի և մշակույթի զարգացումը Հայաստանի մարզերում։ Վստահ եմ, որ կենտրոնը կնպաստի դրա արդյունավետ առաջխաղացմանը: Ռուսական կենտրոնը ոչ միայն ռուսաց լեզվի գիտելիքների կատարելագործման հարթակ է, այլ նաև կնպաստի երկու ժողովուրդների միջև բարեկամական հարաբերությունների հետագա ամրապնդմանը կրթության, մշակույթի և գիտության ոլորտներում», - ասաց Երևանում Մոսկվայի տան գլխավոր տնօրեն Վահրամ Կարապետյանը:
Իջևանում արդեն իսկ անցկացվում են Մոսկվայի տան նախաձեռնած ռուսաց լեզվի անվճար դասընթացները երեխաների համար: «Ռուսական կենտրոնի» բացման արարողության շրջանակներում տեղի ունեցավ այդ դասընթացն ավարտած երեխաներին հավաստագրերի հանձնման հանդիսավոր արարողությունը: Բաց դասի ձևաչափով երեխաները ցուցադրեցին ստացած գիտելիքները, կատարեցին ամանորյա բանաստեղծություններ և երգեր ռուսերեն լեզվով: Ռուսաց լեզվի դասընթացների շրջանավարտները ստացան ամանորյա նվերներ:
«Հուսով եմ, որ ռուսական կենտրոնը կդառնա ոչ միայն ռուսաց լեզվի և մշակույթի հանրահռչակման հարթակ, այլև սիրելի վայր քաղաքի բնակիչների համար, որոնք այստեղ կանցկացնեն իրենց կրթամշակութային Ժամանցը»,-ասել է Իջևան համայնքի ղեկավար Արթուր Ճաղարյանը:
Կենտրոնի բացումը ողջունել է «Թեղուտ» հանքարդյունաբերական կոմբինատի գլխավոր տնօրեն Վլադիմիր Նալիվայկոն:
«Թվայնացման դարաշրջանում պրոֆեսիոնալների երիտասարդ սերնդի կայացումն առանց կրթվածության և համակողմանի զարգացման անհնար է։ Կյանքը մեզ մշտապես որոշակի մարտահրավերներ ու պահանջներ է ներկայացնում։ Ռուսական կենտրոնի բացումը կհարստացնի երեխաների ներաշխարհը, երիտասարդ սերունդն առավել զարգացած ու հաղորդակցվող կդարձնի»,- ասաց Նալիվայկոն:
Կենտրոնի հանդիսավոր բացման ավարտին ելույթ է ունեցել Հայ առաքելական եկեղեցու Տավուշի թեմի մշակույթի կենտրոնի մանկական երգչախումբը:
Ռուսական կենտրոնների աշխարհագրությունը մշտապես ընդլայնվում է։ Նման կրթական հարթակներ նախատեսվում է բացել Հայաստանի բոլոր մարզերում։
Հիշեցնենք, որ սա «Մոսկվայի տուն» մոսկովյան մշակութագործարարական կենտրոնի կողմից բացված թվով հինգերորդ «Ռուսական կենտրոնն» է։
Նույնպիսի կենտրոններ արդեն գործում են Երևանում, Վանաձորում, Արմավիրում և Մալիշկա գյուղում։