ԵՐԵՎԱՆ, 27 դեկտեմբերի – Sputnik. Գրոսմայստեր Տիգրան Պետրոսյանը hայ շախմատիստների շարքում լավագույն արդյունքն է ցուցադրել Վարշավայում ընթացող արագ շախմատի աշխարհի առաջնության առաջին խաղային օրվա ընթացքում: Չնայած մեկնարկային տուրում կրած պարտությանը՝ Պետրոսյանը տարել է չորս հաղթանակ և հինգ տուրից հետո առաջատարներին հետևողների խմբում է՝ իր ակտիվում ունենալով 4 միավոր:
Հինգ տուրից հետո առաջատար երեք շախմատիստներն են լեհ Յան-Քշիշտոֆ Դուդան, աշխարհի չեմպիոն, նորվեգացի Մագնուս Կարլսենն ու վրացի Բաադուր Ջոբավան, որոնք ունեն 4,5-ական միավոր։ Ռոբերտ Հովհաննիսյանն ու Սերգեյ Մովսիսյանը վաստակել են 3,5 միավոր՝ 5-ից։ 3 միավոր հավաքած շախմատիստների մեծ խմբում են Շանթ Սարգսյանը, Մանուել Պետրոսյանը և ամերիկյան դրոշի ներքո հանդես եկող Լևոն Արոնյանը: 2,5 միավոր է գրանցել Հայկ Մարտիրոսյանը։ Հայաստանի հավաքականի առաջատար Գաբրիել Սարսգսյանը 2 միավոր ունի։
Նույնքան էլ հավաքել է Սամվել Տեր-Սահակյանը։ Հատկանշական է, որ Սամվելը միակ շախմատիստն էր, ում առաջնության առաջին օրը չկարողացավ հաղթել աշխարհի չեմպիոն Մագնուս Կարլսենը։ Նրա և Տեր-Սահակյանի պարտիան ավարտվեց ոչ-ոքի։ Խաղը չստացվեց Հայաստանի գործող չեմպիոն Հովհաննես Գաբուզյանի մոտ՝ նա բավարարվեց ընդամենը մեկ միավորով։
Լեհաստանի մայրաքաղաքում ընթացող շախմատի աշխարհի առաջնությունում Հայաստանը ներկայացնում են Գաբրիել Սարգսյանը, Սամվել Տեր-Սահակյանը, Շանթ Սարգսյանը, Ռոբերտ Հովհաննիսյանը, Մանուել Պետրոսյանը, Հայկ Մարտիրոսյանը, Հովհաննես Գաբուզյանը, Տիգրան Պետրոսյանը, Սերգեյ Մովսիսյանը, Էլինա Դանիելյանը, Սուսաննա Գաբոյանը:
Լեհաստանում ընթացող Աշխարհի առաջնության մրցանակային ֆոնդը 1 միլիոն դոլար է: