ԵՐԵՎԱՆ, 26 դեկտեմբերի – Sputnik. Մադրիդի «Ռեալը» աշխատում է ֆուտբոլիստ Արսեն Զախարյանի տրանսֆերը կազմակերպելու ուղղությամբ։ Ակումբը ցանկանում է ձեռքբերել «Դինամոյի» կիսապաշտպանին։ Վկայակոչելով սեփական աղբյուրները՝ գրում է championat.com-ը։
«Մադրիդյան ակումբը ցանկանում է Զախարյանի տրանսֆերն իրականացնել 2022 թվականի ամռանը։ Տրանսֆերի գումարը կարող է կազմել մոտ 20 մլն եվրո, իսկ հավելավճարներով գումարը կարող է հասնել մինչև 25 մլն եվրոյի»,- նշել է կայքի աղբյուրը։
Ըստ տեղեկությունների՝ իսպանական կողմից գործարքն իրականացնելու համար բանակցում են ակումբի նախկին մարզական տնօրեն Պրեդրագ Միյատովիչը, սերբ գործակալ Սրջան Յերեմիչը և Լուկա Մոդրիչի ներկայացուցիչ Վլադո Լեմիչը։ Նշվում է, որ նոյեմբերի սկզբին Լեմիչն ու Յերեմիչը մեկնել են Մոսկվա։
Հավելենք, որ ընթացիկ մրցաշրջանում 18-ամյա Զախարյանը դարձել է 4 գոլի հեղինակ, կատարել յոթ գոլային փոխանցում: Նա նաև 4 հանդիպում է անցկացրել Ռուսաստանի ազգային հավաքականի կազմում։
Զախարյանը ճանաչվել է Ռուսաստանի Պրեմիեր Լիգայի լավագույն երիտասարդ ֆուտբոլիստ։ Նա 445 միավոր էր ստացել քվեարկության արդյունքում, որին մասնակցել էին Ռուսաստանի ֆուտբոլային միության, Պրեմիեր լիգայի և ֆուտբոլային ակումբների ղեկավարները, ինչպես նաև մասնագետներ և ԶԼՄ ներկայացուցիչներ։