2020 թվականի նոյեմբերի 9-ին ընդունված հայտարարությունն էականորեն ազդել է Փաշինյանի անմիջական շփումների ձևաչափի վրա։ Sputnik Արմենիայի հետ զրույցում նման կարծիք հայտնեցքաղտեխնոլոգ Արմեն Բադալյանը` անդրադառնալով ՀՀ վարչապետի դեկտեմբերի 24–ին կայացած ասուլիսին։ Դրանից հետո վարչապետն ընդհանրապես խուսափում է լրագրողների հարցերին անմիջականորեն պատասխանելուց և ընտրում է ֆեյսբուքյան փակ ասուլիսի ձևաչափը։
«Երբ Փաշինյանը նոր էր ստանձնել վարչապետի պաշտոնը, հաճախակի ասուլիսներ էր կազմակերպում և ներկայացնում կառավարության գործունեության 100 փաստերը, նույնիսկ եղան արտագնա ասուլիսներ, որոնց մասնակցում էին նաև ընդդիմադիր լրատվամիջոցների ներկայացուցիչները և անմիջականորեն հարցեր ուղղում վարչապետին, բայց հիմա այդպես չէ։ Նա պատասխանում է ավելի շատ լայքեր հավաքած հարցերին, մինչդեռ այդ լայքերի ստացումը շատ դեպքերում արհեստական է»,– նշեց քաղտեխնոլոգը։
Բադալյանի կարծիքով` Փաշինյանի ասուլիսների ձևաչափը փոխվել է 180 աստիճանով և դարձել մեկուսացված, որովհետև լրագրողները կարող են նրան տալ այնպիսի հարցեր, որոնց չի կարող պատասխանել, մինչդեռ մեկ վարողի ներկայությամբ ասուլիսի ձևաչափը Փաշինյանին թույլ է տալիս խուսափել ոչ ցանկալի հարցերից։ Ըստ քաղտեխնոլոգի` նման ձևաչափի ընտրությունը պայմանավորված է նաև նրանով, որ ներկայացվում են միայն վարչապետին հաճելի հարցերը։
Անդրադառնալով հարցին, թե որքանով էր Փաշինյանն անկեղծ իր պատասխաններում, Բադալյանն առաջարկեց հետևել նաև դեկտեմբերի 27-ին նախանշված ՀՀ երկրորդ նախագահ Ռոբերտ Քոչարյանի բաց ասուլիսին, և այդ հարցում կատարել համեմատություններ` ուշադրություն դարձնելով Քոչարյանին ու Փաշինյանին ուղղված հարցերի բովանդակությանը։ Նրա համոզմամբ` համեմատության մեջ կերևա, թե ով էր ավելի անկեղծ իր մոտեցումներում։
Նշենք, որ դեկտեմբերի 24-ին տեղի է ունեցել ՀՀ վարչապետ Նիկոլ Փաշինյանի առցանց ասուլիսը: ԶԼՄ-ների և հասարակական կազմակերպությունների ներկայացուցիչների համար կազմակերպված ասուլիսի շրջանակում վարչապետը պատասխանել է մի քանի տասնյակ հարցերի: Ասուլիսը տևել է 2 ժամ 26 րոպե։