ԵՐԵՎԱՆ, 26 դեկտեմբերի – Sputnik. «Գազպրոմը» չի ընդունում դեպի Եվրոպա գազի ոչ բավարար մատակարարումների վերաբերյալ մեղադրանքները, հայտարարել է ընկերության պաշտոնական ներկայացուցիչ Սերգեյ Կուպրիյանովը։
«Եվրոպական շուկա քիչ գազ մատակարարելու վերաբերյալ Ռուսաստանի և «Գազպրոմի» հասցեին հնչող բոլոր մեղադրանքները բացարձակապես անհիմն են, անընդունելի և իրականությանը չհամապատասխանող։ Պարզ ասած` կեղծ ու սուտ են», – «Ռոսիա 1» հեռուստաալիքի եթերում հայտնել է ընկերության մամուլի քարտուղարը։
Նա ընդգծել է, որ սպառողները, օրինակ, Ֆրանսիայից և Գերմանիայից, արդեն ամբողջությամբ ընտրել են պայմանագրերով նախատեսված տարեկան ծավալները։ Իսկ ընկերությունը տրանսպորտային հզորություններն ամրագրում առկա հայտերի հիման վրա, և ոչ հակառակը։
Կուպրիյանովը հավելել է, որ ընկերությունը դեռ դեկտեմբերի 15-ին էր կատարել Ուկրաինայով տարանցման պարտավորությունները։
Վերջին տվյալների համաձայն` «Գազպրոմը» 11.5 ամսվա ընթացքում ավելացրել էր արտահանումը դեպի հեռավոր արտասահմանի երկրներ մինչև 178,1 մլրդ խմ, ինչը 4,8 տոկոսով (8,2 մլրդ խմ) ավելի է 2020 թվականի նույն ժամանակահատվածի համեմատ։
Ռուսաստանը 2020 թվականից ավելի շատ գազ է մատակարարել մասնավորապես Գերմանիա, Թուրքիա, Իտալիա, Բուլղարիա, Ռումինիա, Սերբիա, Հունաստան, Սլովենիա, Շվեյցարիա, Հյուսիսային Մակեդոնիա, Բոսնիա և Հերցեգովինա, Լեհաստան, Դանիա և Ֆինլանդիա։
««Գազպրոմը» ինչպես նախկինում, այնպես էլ այսօր պատրաստ է գազի լրացուցիչ ծավալներ մատակարարել գործող երկարաժամկետ պայմանագրերի շրջանակում, և այդ մատակարարումների արժեքն էապես ցածր է, քան սփոթում», – հավելել է ընկերության ներկայացուցիչը։
Բացի այդ «Գազպրոմում» եկել են այն եզրակացության, որ վերջին օրերին Գերմանիայից Լեհաստան և այնտեղից էլ Ուկրաինա ռևերսային մատակարարումներ են լինում օրական 3-5 մլն խմ ծավալով։
«Ընդ որում գազը ստացվում է Գերմանիայի տարածքի ստորգետնյա պահեստարաններից, որտեղից արդեն իսկ վերցվել է գազի 47 տոկոսը, իսկ ձմեռը դեռ նոր է սկսվել։ Սա ռացիոնալ որոշում չէ», – նշել է Կուպրիյանովը։
«Գազպրոմի» ներկայացուցիչը նշել է, որ նման մատակարարումների արժեքն էապես գերազանցում է Ռուսաստանի կողմից մատակարարվող պայմանագրային ծավալների արժեքը։
Ավելի վաղ Վլադիմիր Պուտինը մեկնաբանել էր գազի գնի ռեկորդային աճն ու մեղադրանքները, թե Մոսկվան մանիպուլյացիայի է ենթարկում շուկան` չամրագրելով «Յամալ–Եվրոպա» գազատարի հզորությունները։ Նախագահն ընդգծել էր, որ «Գազպրոմը» գործող երկարաժամկետ պայմանագրերով իրականացնում է գազի ողջ ծավալների մատակարարումը, իսկ Գերմանիայի և Ֆրանսիայի պայմանադիր կողմերը գնման հայտեր չեն ներկայացրել։
Պետխորհրդի և Գիտության ու կրթության խորհրդի նիստին Պուտինը նշել էր նաև, որ եվրոպական երկրներն անձամբ են նպաստել հումքի արժեքի բարձրացմանը` գործարկելով ռուսական գազը ռևերսով։
2015 թվականից Ուկրաինան անմիջականորեն Ռուսաստանից գազ չի գնում, այլ դա անում է Եվրոպայով։ 2020 թվականի սեպտեմբերի սկզբից Կիևն ամբողջությամբ անցել է վիրտուալ ռևերսի միջոցով ռուսական կապույտ վառելիքի գնման. տարանցիկ ծավալների շուրջ 50 տոկոսն այժմ անմիջապես մնում է Ուկրաինայի տարածքում։ Մինչև 2020 թվականը նման բան հնարավոր չէր «Գազպրոմի» պայմանագրով։