Ալիևի մոտ ձևավորվում է ամենաթողության ընկալում, և նա փորձում է առավելագույն չափով օգտվել ընձեռված հնարավորությունից։ Դրան նպաստում է թե՛ միջազգային հանրությունն իր լռությամբ, թե՛ ՀՀ իշխանությունն իր վարած քաղաքականությամբ, որը նույնպես համարժեք չի արձագանքում Ալիևին։ Sputnik Արմենիայի հետ զրույցում այս մասին ասաց «Հայացք» կիրառական քաղաքականության և հետազոտությունների վերլուծական կենտրոնի տնօրեն Աննա Կարապետյանը։
«Ալիևն առաջադրում է նորանոր պահանջներ, և Հայաստանի գործող իշխանությունը բավարարում է դրանք։ Ալիևը Բրյուսելում ՆԱՏՕ–ի գլխավոր քարտուղարի հետ հանդիպման ժամանակ ևս արեց կոշտ հայտարարություն, սակայն ո՛չ Հյուսիսատլանտյան դաշինքի ղեկավարության, ո՛չ Եվրախորհրդի նախագահի խոսքում, ո՛չ էլ Արևելյան գործընկերության գագաթնաժողովի ամփոփիչ փաստաթղթում բառ անգամ չհնչեց` կանխելու Ադրբեջանի նախագահի հռետորաբանությունն ու գնահատական տալու Ադրբեջանի վարած քաղաքականությանը»,– նշեց վերլուծաբանը։
Կարապետյանի կարծիքով` Ալիևը միանգամից մի քանի խնդիր է լուծում, բայց այդ ամենի ակունքները Սոչին և Բրյուսելը չեն, հռետորաբանությունը գալիս է արցախյան 44-օրյա պատերազմից. Ալիևի հայտարարություններին չի եղել միջազգային հանրության կողմից համարժեք պատասխան, չկանխվեցին հայտարարություններից գործողությունների անցնելու քայլերը, Արցախի հանդեպ ագրեսիան միջազգայնորեն չդատապարտվեց, Ադրբեջանն ու Թուրքիան միջազգային իրավունքի հիմնարար նորմերը խախտելու համար որևէ պատիժ չկրեցին, ավելին` Ալիևը մեկ տարուց ավել է, որ ստանում է այն ամենը, ինչ ցանկանում է, որովհետև որքան կոշտացնում է հռետորաբանությունը, այնքան ավելի շատ զիջումներ է ստանում հայկական կողմից։
«Անցյալ տարվա նոյեմբերից ի վեր բազմիցս համոզվել ենք, որ ՀՀ իշխանությունը գնում է Ադրբեջանի հետ բանավոր, գրավոր, գաղտնի, հանրությունից փակ պայմանավորվածությունների, որոնք հետագայում միշտ ծանր հետևանքներ են ունենում մեր երկրի ու ժողովրդի համար։ Այդպիսի օրինակների ականատես եղանք, երբ Գորիս–Կապան ճանապարհի առանձին հատվածներ հանձնվեցին Ադրբեջանի վերահսկողությանը։ Համանախագահող երկրների արտգործնախարարների վերջին հայտարարության մեջ կան ձևակերպումներ, որոնք հուշում են այլ պայմանավորվածությունների առկայության մասին, ինչը չի հանրայնացվում»,– ասաց վերլուծաբանը։
Ըստ նրա` Բրյուսելում դեկտեմբերի 15–ին տեղի ունեցած Փաշինյան–Ալիև առանձնազրույցն արդեն իսկ առաջացնում է բնական մտավախություն առ այն, որ կարող են լինել ինչ–ինչ պայմանավորվածություններ, որոնց մասին չեն տեղեկանում նույնիսկ միջնորդները։
Նշենք` Իլհամ Ալիևը Հադրութ կատարած այցի ժամանակ հայտարարել է, որ այնտեղ կոմանդոսների բրիգադ է տեղակայվելու, զորամիավորումը կկարողանա կատարել ցանկացած մարտական խնդիր, այնտեղ կծառայեն պատրաստվածության բարձր մակարդակ ունեցող անձինք։
Ավելի վաղ նա հայտարարել էր, որ պատերազմի ժամանակ իրականացված գործողությունների թվում Հադրութի գործողությունը հատուկ նշանակություն է ունեցել ինչպես ռազմական, այնպես էլ ռազմավարական տեսանկյունից։
Հավելենք, որ Հադրութը Արցախի Հանրապետության շրջաններից մեկն է, որը 44-օրյա պատերազմի արդյունքում անցել է Ադրբեջանի վերահսկողության ներքո։