ԵՐԵՎԱՆ, 24 դեկտեմբերի – Sputnik. Տարեվերջյան առցանց ասուլիսի ժամանակ Հայաստանի վարչապետ Նիկոլ Փաշինյանը պարզաբանել է, թե ինչու է հայկական կողմը դեկտեմբերի 20-ին Ադրբեջանին վերադարձրել դեկտեմբերի 18-ին հայ դիրքապահների կողմից ձերբակալված երկու ադրբեջանցի զինծառայողներին։
«Մենք վերադարձրել են նրանց առանց նախապայմանների։ Որևէ բանի դիմաց չենք վերադարձրել նրանց, չենք ուզում տպավորություն ստեղծել, որ զբաղված ենք մարդկանց սակարկությամբ։ Դրանով ցույց ենք տվել մեր լիարժեք հավատարմությունը միջազգային նորմերին և կանոններին», ֊ ասաց վարչապետը։
Նշենք, որ ըստ նախորդ տարվա նոյեմբերի 9-ի եռակողմ համաձայնագրի՝ Բաքվի և Երևանի միջև գերիների վերադարձը պետք է իրականացվեր «բոլորը բոլորի դիմաց» սկզբունքով: Այդ հիմնավորմամբ հայկական կողմը դեկտեմբերի 14-ին առաջինը Ադրբեջանին հանձնեց 2014 թվականից Արցախում սպանության, լրտեսության, պետական սահմանի ապօրինի հատման, ռազմամթերք կրելու, անձի առևանգման համար բանտարկված հանցագործներ Շահբազ Գուլիևին ու Դիլհամ Ասկերովին:
Մինչ օրս Բաքվից Հայաստան են վերադարձել 100-ից ավելի գերիներ։ Ադրբեջանը հաստատել է, որ իր մոտ են դեռ շուրջ 50 հայ գերիներ։ Ըստ ՄԻԵԴ–ում գերիների հարցով ՀՀ ներկայացուցիչ Սիրանուշ Սահակյանի՝ ևս 80 անձի մասին ոչ պաշտոնական տեղեկություն կա: