ԵՐԵՎԱՆ, 24 դեկտեմբերի – Sputnik. Տարեվերջյան առցանց ասուլիսին Հայաստանի վարչապետ Նիկոլ Փաշինյանը պատասխանել է Sputnik Արմենիայի հարցին, որը վերաբերում էր դեկտեմբերի 14-ին նրա հանդիպմանը Ադրբեջանի նախագահ Իլհամ Ալիևի հետ։
Խոսելով առանձնազրույցի բովանդակությունից՝ Փաշինյանը ասաց, որ «քննարկել են նույնը, ինչ դրանից առաջ»։ Փաշինյանի և Ալիևի առանձնազրույցից առաջ նրանք համատեղ հանդիպում էին ունեցել Եվրոպական խորհրդի նախագահ Շառլ Միշելի հետ։ Փաշինյանը ժպիտով ասաց, որ Միշելը իրենց «չէր խանգարում»։
«Այնպես չէր, որ Շառլ Միշելը սենյակից դուրս եկավ, և մեր թեման փոխվեց, ոչ դինամիկան է փոխվել, ոչ հարցերը», ֊ ասաց վարչապետը։
Հայաստանի վարչապետը չկարողացավ ասել, թե կոնկրետ քանի րոպե է տևել իր առանձնազրույցը Ադրբեջանի առաջնորդի հետ՝ տատանվելով 15֊ից 30 րոպեի միջև։
Հիշեցնենք՝ Փաշինյանը և Ալիևը Բրյուսելում հանդիպել էին դեկտեմբերի 14-ին, իսկ դեկտեմբերի 15-ին մասնակցել էին Եվրամիության Արևելյան գործընկերության երկրների գագաթնաժողովին։