ՀԱՊԿ-ում սկսել են կարևորել Հայաստանի դերն ու նշանակությունը գեոպոլիտիկ փոփոխությունների համատեքստում։ Հենց դրանով էլ պայմանավորված էր ՀԱՊԿ գլխավոր քարտուղար Ստանիսլավ Զասի հայաստանյան այցը։ Sputnik Արմենիայի հետ զրույցում նման տեսակետ հայտնեց ռազմական փորձագետ Նարեկ Ներսիսյանը։
«Մինչ այժմ մեր երկիրն այդքան էլ կարևոր չէր ՀԱՊԿ-ի համար։ Պետք է փաստենք, որ Յուրի Խաչատուրովի հետկանչից և նրան ձերբակալելուց հետո բավականին լարված էին մեր հարաբերությունները»,- նշեց նա։
Ռազմական փորձագետի կարծիքով` ՀԱՊԿ գլխավոր քարտուղարի ակտիվությունը պայմանավորված է տարածաշրջանային զարգացումներով. Հարավային Կովկասում այժմ ստեղծվել է մի իրավիճակ, երբ Ռուսաստանի և Հայաստանի շահերը համընկնում են, իսկ ՀԱՊԿ ասելով նախևառաջ հասկանալ, որ խոսքը Ռուսաստանի Դաշնության մասին է։
«ՀԱՊԿ ասելով` նախևառաջ պետք է հասկանալ ՌԴ-ն, և, քանի որ Հայաստանն ու ՌԴ-ն այս պայմաններում համընկնող գծեր ունեն, դրանք պետք է ի կատար ածվեն, որոնք բխում են երկու պետությունների շահերից»,- ընդգծեց Ներսիսյանը։
Հիշեցնենք` Ստանիսլավ Զասը Հայաստան է եկել դեկտեմբերի 22-ին։ Նրան ընդունել են ՀՀ պաշտպանության նախարար Սուրեն Պապիկյանը, ՀՀ վարչապետ Նիկոլ Փաշինյանը և ՀՀ արտգործնախարար Արարատ Միրզոյանը։
Ստանիսլավ Զասը հարգանքի տուրք է մատուցել Հայոց ցեղասպանության զոհերի հիշատակին։