ԵՐԵՎԱՆ, 24 դեկտեմբերի - Sputnik. ՀՀ վարչապետը նշեց, որ հեղափոխությունից հետո իրենք հասկացել են, որ պետական խորհրդանիշներին, արարողակարգերին հարկավոր է վերաբերվել պատշաճ ձևով։
Հայաստանի վարչապետ Նիկոլ Փաշինյանն այսօր առցանց ասուլիսում անդրադարձավ պաշտոնյաների աշխատասենյակներում իր լուսանկարների կախված լինելու խնդրին ու հիշեցմանը, որ ընդդիմադիր գործչի կարգավիճակում ինքը քննադատում էր նախկինների այդ ավանդույթը։
«Ես ժամանակին խոսել եմ Սերժ Սարգսյանի լուսանկարը Հատուկ քննչական ծառայության քննիչի սենյակում կախված լինելու մասին։ Ես երբեք չեմ խոսել, որ նախարարի կամ բարձրաստիճան պաշտոնյայի սենյակում պետք է կախված չլինի երկրի ղեկավարի նկարը»,– ասաց Փաշինյանը։
Ինչ վերաբերում է իր լուսանկարը պաշտոնյաների աշխատասենյաներում փակցնելուն, Փաշինյանը նշեց, որ հեղափոխությունից հետո իրենք հասկացել են, որ պետական խորհրդանիշներին, արարողակարգերին հարկավոր է վերաբերվել պատշաճ ձևով։
Հիշեցնենք` ՀՀ արդարադատության նախարար Կարեն Անդրեասյանը հայտնել էր, որ իր աշխատասենյակում փակցված է Փաշինյանի լուսանկարը։
Նախարարն ասել էր նաև, որ նայելով լուսանկարին` հիշում է, որ պետք է լինել ազնիվ, անաչառ և պահպանել այն բոլոր պահանջները, որ իր առաջ դրել է վարչապետը։
Ավելի ուշ ՀՀ ՊԵԿ նախագահ Ռուստամ Բադասյանը ևս հաստատեց, որ իր աշխատասենյակում փակցված է վարչապետ Նիկոլ Փաշինյանի լուսանկարը։ Նա նաև մեկնաբանել էր, որ այդպիսին է սահմանված նոր կարգը։