ԵՐԵՎԱՆ, 23 դեկտեմբերի – Sputnik, Լաուրա Սարգսյան. 2021 թվականին Հայաստան է այցելել մոտ 900 հազար զբոսաշրջիկ, իսկ այդ ցուցանիշը 2020 թվականի նույն ժամանակահատվածի համեմատ գրեթե կրկնակի շատ է: Տեղեկությունը Sputnik Արմենիային հայտնեց ՀՀ էկոնոմիկայի նախարարության Զբոսաշրջության կոմիտեի նախագահի պաշտոնակատար Արթուր Խաչատրյանը։
Նրա խոսքով՝ սա բավականին լավ թիվ է, եթե համեմատենք Հայաստանի համար բավականին ծանր 2020 թվականի հետ։
«Սակայն մենք դեռ շատ բան ունենք անելու` հաշվի առնելով այն հանգամանքը, որ 2019թ․-ին այցելուների թիվը հասել էր 2 միլիոնի»,-ասաց Խաչատրյանը։
Կոմիտեի ղեկավարի պաշտոնակատարը նշեց, որ պատերազմի հետևանքով և համավարակով պայմանավորված խոչընդոտներ կան, սակայն դրանք հաղթահարելի են։
Հայաստանի գրավչությունը մեծացնելու համար 2021 թվականին մարկետինգային մի շարք քայլեր են իրականացվել։ Կազմակերպվել են միջոցառումներ, միջազգային հայտնի ԶԼՄ-ների ներկայացուցիչների և բլոգերների համար տուրեր, ռուսական և ուկրաինական հեղինակավոր ամսագրերում և պարբերականներում տպագրվել են Հայաստանի տեսարժան վայրերի և ավանդական խոհանոցի մասին նյութեր։
Միաժամանակ գրեթե անփոփոխ է մնացել այն երկրների եռյակը` Ռուսաստան, Իրան ու Վրաստան, որտեղից ամենաշատ զբոսաշրջիկներ են գալիս Հայաստան ։ Կոմիտեն նաև աշխատանքներ է իրականացնում Հայաստանի հանրահռչակման համար նոր թիրախային շուկաների բացահայտման ուղղությամբ։ Այս պահի դրությամբ մեր երկրի հանդեպ հետաքրքրությունն ավելացել է ԱՄԷ-ում։
Թիրախային են համարվում նաև Ուկրաինան, Ավստրիան և մարկետինգային երկրորդային օղակի մի շարք երկրներ։ Բացի այդ, կոմիտեն մտադիր է ավելացնել այցելուների հոսքը նաև հարևան Վրաստանից և Իրանից: Միջկառավարական հանձնաժողովի առաջիկա նիստում հայկական կողմը հաստատման կներկայացնի երկամյա գործողությունների պլանի կարճաժամկետ ծրագիրը։ Կոմիտեի ղեկավարի պաշտոնակատարի կարծիքով՝ դա թույլ կտա ավելացնել հոսքերը հարևան երկրից դեպի մեր երկիր։
Խաչատրյանը նշեց, որ ՀՀ–ում զարգանում է գաստրո և էկոտուրիզմը։ Քայլեր են ձեռնարկվում Հայաստանը ճանաչելի դարձնելու ուղղությամբ՝ որպես զբոսաշրջային գաստրոքարտեզի վրա այցելության ցանկալի ուղղություն։ Այս համատեքստում նա նշեց նաև համայնքներում իրականացվող աշխատանքները:
Հիշեցնենք` էկոնոմիկայի նախարարության տվյալներով՝ 2020 թվականի հունվար-սեպտեմբերին, 2019 թվականի նույն ժամանակահատվածի համեմատ, զբոսաշրջիկների թիվը կրճատվել էր 75,5 տոկոսով: Ընթացիկ տարում Հայաստան է այցելել 327 735 մարդ։ Ընդ որում` 2020թ.-ի համար մասնագետները կանխատեսում էին զբոսաշրջային հոսքի 14-15% աճ։ Ըստ Զբոսաշրջության համաշխարհային կազմակերպության տվյալների՝ 2020 թվականի հունվար-հոկտեմբեր ամիսներին զբոսաշրջության ոլորտում անկումը կազմել է 72 տոկոս, ճամփորդել է 900 միլիոնով պակաս մարդ, քան անցյալ տարվա նույն ժամանակահատվածում: