ԵՐԵՎԱՆ, 23 դեկտեմբերի - Sputnik. Արմավիրի մարզի Փարաքար համայնքի ղեկավարի թեկնածու, «Ապրելու երկիր» կուսակցության ներկայացուցիչ Վալոդյա Գրիգորյանին ոստիկանները թույլ չեն տալիս մտնել Փարաքարի համայնքապետարան։ Նրանք փակել են համայնքապետարանի մուտքը։
Նշենք, որ քիչ առաջ «Ապրելու երկիր» կուսակցության համակիրները հավաքվել էին համայնքապետարանի առջև, որտեղ տեղի ունեցավ Գրիգորյանի երդմնակալության արարողությունը։
Դրանից հետո Վալոդյա Գրիգորյանը քաղաքացիների, «Ապրելու երկիր» կուսակցության հիմնադիրներ Մանե Թանդիլյանի և Մեսրոպ Առաքելյանի հետ մոտեցավ ոստիկաններին։
«Ճիշտ ենք հասկանում, որ մեզ եք դիմավորում»,- հեգնեց Թանդիլյանը։ Մեսրոպ Առաքելյանն էլ իր հերթին նշեց, որ Գրիգորյանն ավագանու անդամ է և իրավունք ունի համայնքապետարան մտնելու։
Ոստիկանության ներկայացուցիչը, դիմելով Առաքելյանին, նշեց, որ ժամանակավորապես սահմանափակվել է անձանց մուտքը համայնքապետարան։ Նա հրաժարվեց համապատասխան փաստաթուղթը ներկայացնել։ Շեշտեց միայն, որ պատճառներն իմանալու համար պետք է գրավոր դիմել ոստիկանություն:
«Ապրելու երկիր» կուսակցության ներկայացուցիչներն ու համակիրները մի քանի րոպե ժամանակ տվեցին ոստիկանությանը, որպեսզի համայնքապետարանի մուտքը փակելու և ավագանու անդամներին ներս չթողնելու օրինական հիմքեր ներկայացնեն։
Մանե Թանդիլյանը կրկին պահանջեց ներկայացնել ոստիկանական գործողությունների հիմքերը։ «Գործը գտնվում է վարչական դատարանում, այլ բան չեմ կարող ասել»,-նշեց ոստիկանության ներկայացուցիչը։
Մանե Թանդիլյանն ու Մեսրոպ Առաքելյանը բացատրեցին, որ եթե անգամ գործը վարչական դատարանում է, միևնույն է, ոստիկանությունն իրավունք չունի ավագանու անդամներին արգելել մտնել համայնքապետարան։
Նշենք, որ «Ապրելու երկիր» կուսակցությունը 21 հոգանոց ավագանիում ստացել է 10 մանդատ, և նրանք պնդում են, որ 10 ձայնով իրենց թեկնածուն՝ Վալոդյա Գրիգորյանը ընտրվել է համայնքի ղեկավար:
Իսկ, ահա, «Դավիթ Մինասյան» դաշինքն էլ պնդում է` ավագանու 11 ձայներով համայնքապետ է ընտրվել Դավիթ Մինասյանը (նրան ձայն էին տվել նաև ՔՊ-ի ավագանու անդամները):