ԵՐԵՎԱՆ, 23 նոյեմբերի - Sputnik. ՀՀ ԱԺ նախագահի տեղակալ, Հայաստան-Հնդկաստան բարեկամական խմբի ղեկավար Հակոբ Արշակյանն ընդունել է Հայաստանում Հնդկաստանի Հանրապետության արտակարգ և լիազոր դեսպան Կիշան Դան Դևալին:
Հանդիպման ընթացքում ԱԺ փոխնախագահը կարևորել է դեսպանի արդյունավետ աշխատանքը:
«Դիվանագիտական հարաբերությունների հաստատումից ի վեր անցած 29 տարիների ընթացքում Հայաստանին և Հնդկաստանին հաջողվել է պատմական խոր արմատներ ունեցող բարեկամական կապերը վերածել միջպետական ջերմ և գործընկերային հարաբերությունների»,-ասել է Արշակյանը:
Խոսելով Լեռնային Ղարաբաղի հիմնախնդրի մասին՝ ԱԺ փոխնախագահն անդրադարձել է Ադրբեջանում գերեվարված անձանց շուտափույթ վերադարձի կարևորությանը:
ԱԺ նախագահի տեղակալն ընդգծել է, որ Հայաստանը Ջամմուի ու Քաշմիրի հարցում վերահաստատում է իր աջակցությունը Հնդկաստանին և հույս հայտնել, որ խնդիրը խաղաղ հանգուցալուծում կստանա:
Կարևորվել է երկու երկրների միջև ուղիղ ավիացիոն չվերթների իրագործումը:
Ընդգծվել է «Հյուսիս-հարավ» տրանսպորտային միջանցքի կարևորությունը և դրա միջազգային նշանակությունը:
Հնդկաստանի դեսպանն իր հերթին կարևորել է հայ-հնդկական հարաբերությունների խորացումը և նշել, որ առաջիկայում Հնդկաստանի խորհրդարանում ևս կձևավորվի բարեկամական խումբ:
Կիշան Դան Դեվալը կարևորել է նաև ԼՂ հակամարտության կարգավորումը խաղաղ բանակցությունների ճանապարհով և ԵԱՀԿ Մինսկի խմբի համանախագահության շրջանակում:
Քննարկվել են նաև երկկողմ համագործակցության նոր հեռանկարային ուղղությունները։