ԵՐԵՎԱՆ, 23 դեկտեմբերի – Sputnik. Այս տարի գյուղմթերքի արտահանման ծավալներն աննախադեպ են եղել, հատկապես շատ է արտահանվել կարտոֆիլ, ծիրան, դեղձ, կեռաս, հատապտուղներ, լոլիկ, վարունգ և կաղամբ, սակայն սա չի նշանակում, որ արտադրության ծավալները նույնպես բարձր են եղել։ Sputnik Արմենիայի հետ զրույցում ասաց ՀՀ գյուղատնտեսության նախկին փոխնախարար Գառնիկ Պետրոսյանը։
Էկոնոմիկայի նախարար Վահան Քերոբյանը հայտնել էր, որ այս տարի ունենք ռեկորդային թվով առաջնային գյուղմթերքի արտահանում` 200 000 տոննան գերազանցվել է։ Իսկ նախորդ 2 տարիներին 140 000 տոննան ենք գերազանցել։
Նրա խոսքով` վերջնական բացասական արդյունք կգրանցվի նաև անասնապահության ոլորտում, քանի որ երաշտի պատճառով անասնակերի լուրջ խնդիր կա, գյուղացիները չեն հասցրել շատ կեր կուտակել։ Սա, ըստ նրա, կազդի նաև կենդանիների մթերատվության վրա։
Պետրոսյանը նշեց, որ արտահանման ծավալների մեծացումը որևէ կերպ չի ազդել ներքին շուկայում գնաճի վրա, բացառությամբ կարտոֆիլի։ Սակայն հաջորդ տարի, ըստ նրա, կարտոֆիլի շուկայում իրավիճակը կկայունանա։
Պետրոսյանի խոսքով` գնաճ է արձանագրվել դիզվառելանյութի, թունաքիմիկատների, պարարտանյութի, գյուղտեխնիկայի շուկայումն, իսկ գյուղացիական արտադրանքի գները շատ փոքր չափով են ավելացել։ Ավելին` գյուղացու վիճակի մեջ ոչ միայն որևէ դրական տեղաշարժ չկա. բերքի ծավալների կրճատումը լուրջ հարված է հասցրել նրան։
Նախկին պաշտոնյայի դիտարկմամբ` այս տարի գյուղոլորտում բացասական ցուցանիշ կգրանցվի, քանի որ գյուղմթերքի գնաճը, ոռոգման համակարգի անկատարությունը, երաշտն իրենց գործն արել են։
Նա նշում է` ոլորտի ամենակարևոր խնդիրներից մեկը` ոռոգման հարցը, մնում է չլուծված. այն ինչպես եղել է անցյալում` բարձիթողի և անկառավարելի վիճակում, այդպես էլ մնացել է։ Գյուղատնտեսության նախկին փոխնախարարի խոսքով` ոռոգման համակարգի քայքայված լինելու հետևանքով ահռելի չափերի են հասնում ջրի կորուստները, և գյուղացին շատ մեծ վնասներ է կրում ոռոգման ջրի բացակայության կամ անկանոն մատակարարման հետևանքով։ Պետրոսյանը նկատում է` ջրի ընդհատումներով մատակարարումները կործանարար ազդեցություն են ունենում գյուղատնտեսության համար։
«Շատ հաճախ «վայ-կառավարիչները» գյուղացիներին ասում են` յոլա գնացեք, մինչև խնդիրը կկարգավորենք։ Բայց նման բան ասողները չեն հասկանում, որ խոսքը մարդու հագնվելու կամ էլ սնվելու մասին չէ. բույսը 1-2 օր չջրեցիր, անդառնալի պրոցեսներ կարող են ընթանալ։ Ցավոք, կարծում եմ, որ հաջորդ տարի էլ չենք կարողանալու խուսափել այս խնդիրներից»,–ասում է Պետրոսյանը։
Ըստ նրա` այս ամենին գումարվում է նաև կադրային վատ քաղաքականությունը, քանի որ ոլորտում հաճախ ոչ պրոֆեսիոնալներ են ընդգրկվում։ Ուստի գյուղատնտեսության ոլորտում այս տարի դրական արդյունքների մասին խոսել չենք կարող։