ԵՐԵՎԱՆ, 22 դեկտեմբերի – Sputnik. Երևանի ավագանու «Իմ քայլը» խմբակցության անդամները չեն մասնակցել նիստերին ու քվորում չեն ապահովել։
Այս մասին ավագանու արտահերթ նիստում ասաց ավագանու անդամ Իզաբելլա Աբգարյանը։
«Ես երկու տարի եղել եմ «Իմ քայլը» խմբակցության անդամ, շատ լավ հիշում եմ, որ քաղաքապետը գալիս էր խմբակցության նիստերին, որտեղ քվորում չէր ապահովվում։ Մշտապես գալիս էինք նույն մարդկանցով, և դա արձանագրված է նիստերին հաճախելիության մեր ստորագրություններով»,– նշեց Աբգարյանը։
Նա նաև պահանջեց հրապարակել այդ թղթերը, որպեսզի երևանցիները տեսնեն, թե ովքեր են զբաղվել մայրաքաղաքի խնդիրներով, իսկ ովքեր էին «Facebook-ում նստած»։
Աբգարյանը նաև շեշտեց, որ քաղաքապետը խնդրում էր, որպեսզի քվորում ապահովվեն ու բերված հարցերը հաստատվեն։
«Հարցերից մեկը, այսպես կոչված, դղյակների օրինականացման և չօրինականացման հարցն էր, սակայն շատերդ չեք իմանա, քանի որ չեք մասնակցել այդ նիստերին։ «Իմ քայլի» դիրքորոշումն այնպիսին էր, որ դա պետք էր օրինականացնել, որպեսզի համայնք գումար մտնի, քանի որ այլ կերպ այդ շենքերը հնարավոր չէր օգտագործել», – ասաց ավագանու անդամը և հավելեց, որ, մասնավորապես խոսքը եղել է նախկին վարչապետ Հովիկ Աբրահամյանի առանձնատան մասին։
Նշենք, որ ավագանին արտահերթ նիստով քննարկում է քաղաքապետ Հայկ Մարությանին անվստահություն հայտնելու որոշման նախագիծը։
Դեկտեմբերի 17-ին «Իմ քայլը» խմբակցությունը մուտքագրել էր քաղաքապետ Հայկ Մարությանին անվստահություն հայտնելու նախագիծը։ Հավաքվել էր 44 ստորագրություն, որից 39-ը «Իմ քայլը» խմբակցության անդամներինն էր։