ԵՐԵՎԱՆ, 21 դեկտեմբերի – Sputnik. ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի դեմ հարուցված քրգործով դատական նիստը հետաձգվեց. Գևորգյանի պաշտպան Լուսինե Սահակյանը մեկ այլ դատական նիստի պետք է մասնակցեր։
Նշենք, որ նիստն ընթանում էր Երևան քաղաքի ընդհանուր իրավասության դատարանում` Աննա Դանիկեբյանի նախագահությամբ։ Նիստին ներկա էին ինչպես Քոչարյանը, այնպես էլ Գևորգյանը։
Փաստաբան Սահակյանը նշեց, որ պետք է մեկ այլ դատական նիստի մասնակցի, որի ժամանակ պաշտպանյալի ազատության հարցը պետք է քննարկվի։ Միաժամանակ Սահակյանը միջնորդեց դատական նիստեր չգումարել այն օրերին, երբ Գևորգյանն ԱԺ նիստեր ունի։
Գործով դատախազ Գևորգ Բաղդասարյանն առարկեց 2 միջնորդության առնչությամբ` ասելով, որ ստացվում է` ԱԺ պատգամավորը ցանկացած պատճառով կարող է դատական նիստին չմասնակցել։
«Դատարանն արձանագրում է, որ այս քրգործով դատական նիստերն առանց այն էլ հետաձգվում են պաշտպանության կողմի բացակայության պատճառով, ուստի նպատակահարմար չենք գտնում սահմանել այն ժամանակահատվածները, որոնց ընթացքում նիստեր չպետք է իրականացվեն։ Դատարանն արձանագրում է, որ ներկայացված միջնորդությունն անհիմն է և ենթակա չէ բավարարման»,–ասաց դատավոր Դանիբեկյանը` մերժելով ԱԺ նիստերի օրերին քրգործով նիստեր գումարելու միջնորդությունը։
Սակայն Սահակյանի մյուս` այսօրվա դատական նիստը հետաձգելու միջնորդությունը բավարարվեց։ Դատավորը հայտնեց, որ վերջին անգամ են բավարարում միջնորդությունը, հաջորդ անգամ նման բան չի լինելու, քանի որ դատարանը քանիցս խնդրել է այնպես դասավորել գրաֆիկը, որ համընկնումներ չլինեն։
Այսպիսով, հաջորդ դատական նիստը տեղի կունենա 2022-ի հունվարի 18-ին` ժամը 13-ին։
Նշենք, որ ՀՀ երկրորդ նախագահ Ռոբերտ Քոչարյանին առանձնապես խոշոր չափերի կաշառք ստանալու, իսկ նախկին փոխվարչապետ Արմեն Գևորգյանին՝ փողերի լվացման մեղադրանք է առաջադրվել։