Դատելով ընթացող պրոցեսներից` Հայկ Մարությանին անվստահություն հայտնելն ավելի շուտ պայմանավորված է քաղաքական, այլ ոչ թե աշխատանքային դրդապատճառներով, Sputnik Արմենիայի հետ զրույցում ասաց կառավարման փորձագետ, տնտեսագետ Կարեն Սարգսյանը։
«Քանի որ Մարությանն ընթացքում խզեց կապերն իշխող քաղաքական թիմի հետ և վերջին ընտրություններում ակտիվ աջակցություն չցուցաբերեց թիմակիցներին, հետևաբար քաղաքական թիմն ուներ այն հիմքերը, որպեսզի քաղաքապետին անվստահություն հայտներ ու նրան փոխարիներ իր ներսից մեկ այլ անձով։
Քանի որ Մարությանի պաշտոնավարման ավարտին երկար ժամանակ չի մնացել, կարելի էր տվյալ հարցը չքննարկել ու սպասել պաշտոնավարման ավարտին։ Նրա աշխատանքում եղել են և՛դրական, և՛ բացասական կողմեր, ուստի ընդհանուր գնահատականը պետք է հնչեր քաղաքապետի տարեկան հաշվետվության ժամանակ»,– ասաց կառավարման փորձագետը։
Սարգսյանի դիտարկմամբ` եթե քաղաքապետը դուրս է եկել թիմից, բնականաբար տվյալ քաղաքական պաշտոնի պարագայում խմբակցությունը կարող է ընտրել այլ թեկնածու, և դրանում արտառոց որևէ բան չկա։ Ըստ նրա`քաղաքապետի նախորդ ընտրությունները կայացել են բոլորովին այլ իրավիճակում, այդ գործընթացի վրա ազդել են ուրիշ գործոններ, և երևանցիներն ընտրել են ավելի շուտ Փաշինյանի քաղաքական թիմին, այլ ոչ թե կոնկրետ Մարությանին։
«Երևանի կառավարման գործում քաղաքացիների ներգրավվածության առումով դեռ անելիքներ կան։ ՏԻՄ ընտրությունների ժամանակ տեսանելի էր, որ բնակչությունն այդքան ակտիվ չէ և ավելի շատ անձերի գործոնն է դեր խաղում, քան կուսակցությունների միջև գաղափարական ու ծրագրային պայքարը»,– նշեց փորձագետը։
Սարգսյանի գնահատմամբ` դեռևս այս ոլորտում ինստիտուցիոնալ կառավարման փորձի պակաս կա, հետևաբար անհրաժեշտ է երկար ճանապարհ անցել։ Ըստ նրա` դեռևս չունենք այնպիսի իրավիճակ, երբ կարող ենք խոսել ժողովրդի ամբողջական ներգրավվածության, նրա ձայնը լսելի լինելու մասին։
Հիշեցնենք, որ երեկ Երևանի ավագանու «Իմ քայլը» խմբակցությունը հայտարարել էր, որ չի մասնակցելու դեկտեմբերի 21-ին կայանալիք նիստին, ինչի պատճառը քաղաքապետ Հայկ Մարությանի հետ քաղաքական հակասություններն են։
Հավելենք, որ դեկտեմբերի 17-ին «Իմ քայլը» խմբակցությունը մուտքագրել էր քաղաքապետ Հայկ Մարությանին անվստահություն հայտնելու նախագիծը։ Հավաքվել էր 44 ստորագրություն, որից 39-ը «Իմ քայլը» խմբակցության անդամներինն էր։
Դեկտեմբերի 22-ին կհրավիրվի Երևան քաղաքի ավագանու արտահերթ նիստ։ Օրակարգում մեկ հարց է` «Երևանի քաղաքապետ Հայկ Մարությանին անվստահություն հայտնելու մասին» Երևան քաղաքի ավագանու որոշման նախագիծը։