Հռոմի Ֆրանցիսկոս պապը Հռոմի Կաթոլիկ եկեղեցու 266-րդ պապն է, որն ընտրվելուց հետո ի պատիվ սուրբ Ֆրանցիսկ Ասսիզեցու է ստացել այդ անունը։ Այսօր նա նշում է իր ծննդյան 85–րդ ամյակը։
Հռոմի Ֆրանցիսկոս պապը նախորդներից առանձնանում է իր ժամանակակից հայացքներով, պարզությամբ , ժողովրդականությամբ։ Նա կոտրեց առկա բոլոր կարծրատիպերը պապերի մասին։ Իր հիմնական առաքելությունը համարում է խեղճերին ու աղքատներին օգնելը:
Նա քննադատում է կապիտալիզմը, կոչ է անում կանանց ներգրավել եկեղեցու կառավարման գործում, չի քննադատում արտամուսնական կապերից ծնված երեխաներին և այլն:
Վերջին 1200 տարվա պատմության մեջ նա առաջին լատինաամերիացի պապն է: 2013 թվականին երբ նա բարձրացավ Հռոմի պապի աթոռին, Time ամսագիրը նրան հռչակեց տարվա մարդ:
Իր ընտրությունից հետո Ֆրանցիսկոս պապը կոչ արեց մարդկանց չգալ Վատիկան և չմասնակցել իր ձեռնադրման արարողությանը, այլ այդ գումարը, որը իրենք պատրաստվում էին ծախսել ուղևորության վրա, տալ կարիքավորներին:
Ֆրանցիսկո պապը շատ համեստ է իր ծախսերում. նա ինքն է վճարում իր համար հյուրանոցներում կանգ առնելիս, հրաժարվում է շրջագայել այսպես կոչված պապոմոբիլով և օգտվել այլ արտոնություններից, որոնք ունեին իր նախորդները: Նա համարվում է ամենազատական պապը վերջին տասնամյակների ընթացքում, չի խոսում վերամբարձ տոնով, որը հատուկ էր նախորդ պապերին և եպիսկոպոսներին և ասում է. «Ով եմ ես, որպեսզի դատեմ ինչ-որ մեկին»:
Այս ամենից բացի, Հռոմի Պապը նաև ֆուտբոլի մեծ երկրպագու է։ Նա շարունակում է Բուենոս Այրեսի «Սան Լորենսո դե Ալմագրո» ֆուտբոլային ակումբի երկրպագուն մնալ։ Եվ բոլոր խաղերը դիտում է բացառապես համացանցում, քանի որ դեռ 1994 թվականին հրաժարվել է հեռուստացույց դիտելուց։