ԵՐԵՎԱՆ, 17 դեկտեմբերի – Sputnik. Հայկական FlyOne ավիաընկերությունը չեղարկել է դեկտեմբերի 20-ից հունվարի 31-ի բոլոր չվերթերը դեպի Ռուսաստան։ Տեղեկությունը հայտնում է ընկերության մամուլի ծառայությունը։
Նշվում է, որ FlyOne–ն ստիպված է եղել չեղարկել չվերթերը ընկերությունից անկախ հանգամանքների ի հայտ գալու (այդ թվում ռուսական պատկան մարմինների՝ կորոնավիրուսի համաճարակին հակազդելու մտահոգությունների հետ կապված) պատճառներով։
Ավիաընկերությունից վստահեցնում են, որ կապահովվի դեկտեմբերի 17-ից դեկտեմբերի 19–ը նախատեսված բոլոր չվերթերի ուղևորների արագ ու անվտանգ տեղափոխման հնարավորությունը նշանակման վայրեր այնպես, ինչպես արդեն իսկ ապահովվել է նախկին չվերթերի դեպքում։
«Ընկերությունը չեղարկված չվերթերի բոլոր ուղևորներին առաջարկում է գումարի ամբողջական վերադարձ կամ գումարի փոխանցում ուղևորի անունով FLYONE ARMENIA-ի առցանց միջավայրի վիրտուալ դրամապանակում՝ տոմսի գումարի 120%-ի չափով: Եթե տոմսը ձեռք է բերվել ճամփորդական գործակալության միջոցով` ընկերությունը խնդրում է դիմել գործակալություն՝ տոմսի վերադարձի կամ ժամկետների փոփոխության համար»,– նշում են ընկերությունից։
FlyOne–ը վստահեցնում է, որ իրենց աշխատակիցները շարունակելու են մշտական ու անհատական կապի մեջ մնալ դեպի ՌԴ բոլոր չվերթերի ուղևորների հետ՝ առաջացող ցանկացած խնդրին արագ ու ժամանակին լուծում տալու ուղղությամբ։ Ընկերության ուղևորների սպասարկման ծառայությունը հասանելի կլինի ուժեղացված ռեժիմով։
Նշենք, որ ավիաընկերությունը 7 ուղղությամբ ուղիղ չվերթեր պետք է սկսեր դեկտեմբերի 15-ից։ Առաջին չվերթը նախատեսված էր դեպի Մոսկվա։ Հայտարարված մյուս ուղղությունների թվում են Թեհրանը, Լիոնը, Թել Ավիվը, Կրասնոդարը, Թբիլիսին և Ստամբուլը։ Ավիաընկերության մամուլի ծառայությունը հայտնել է, որ տոմսերի արժեքը սկսվում է 39 եվրոյից 6 ուղղությամբ, 44 եվրոյով էլ՝ Լիոն:
Ընկերությունը, սակայն, դեկտեմբերի 15-ին չեղարկեց իր առաջին չվերթերը։ Երևան-Մոսկվա-Երևան երթուղով չվերթեր էին նախատեսված դեկտեմբերի 15-ին ու 16-ին։
Հիշեցնենք, որ «Flyone Armenia»-ն հիմնադրվել է 2021 թվականին։ Հոկտեմբերի 27-ին ՀՀ Քաղաքացիական ավիացիայի կոմիտեն ընկերությանը տրամադրել է օդանավ շահագործողի վկայական։
Ավիաընկերության պարկը բաղկացած է Airbus A320 ընտանիքի ինքնաթիռներից։
Այսպիսով` արդեն 2022 թվականին Հայաստանում կգործեն միանգամից չորս տեղական ավիաընկերություններ՝ Armenia Aircompany, Armenia Airways, Flyone Armenia, Fly Arna: