Թուրքիային հաջողվել է Ռուսաստանին համոզել, որ Հարավային Կովկասում գտնվում է որպես առանձին պետություն, այլ ոչ թե որպես ՆԱՏՕ–ի անդամ երկիր, և հասել է նրան, որ մեր տարածաշրջանում փորձում է համագործակցության հասնել Ռուսաստանի հետ։ Sputnik Արմենիայի հետ զրույցում այս մասին ասաց թուրքագետ Կարեն Հովհաննիսյանը։
«Թուրքիան վերջին շրջանում, գոնե առնվազն վերջին երկու տարում, ձգտում է ամբողջ աշխարհին ցույց տալ, որ մտադրություն ունի հետայսու հանդես գալ որպես ռազմաքաղաքական առանձին միավոր, և այդ համատեսքտում արդիական են թյուրքալեզու պետությունների միավորում ստեղծելու Անկարայի ծրագրերը, հետևաբար փորձելու է այդ ներուժը հակադրել ՆԱՏՕ–ին և ՀԱՊԿ–ին»,– ասաց թուրքագետ–քրդագետը։
Հովհաննիսյանի կարծիքով` թուրքական դիվանագիտությունն այնքան ճկուն է, որ չի կարելի բացառել մի իրավիճակ, երբ Թուրքիան վերստին կարող է հանդես գալ որպես ՆԱՏՕ–ի անդամ պետություն` Հյուսիսատլանտյան դաշինքին ներքաշելով հակամարտության մեջ, եթե Ռուսաստանը որևէ հարցում համամիտ չլինի նրա հետ։
Ըստ նրա` Թուրքիան, այդուհանդերձ, իրականում բավականին խոցելի պետություն է, ինչի մասին քաջատեղյակ են թե՛ Մոսկվան, թե՛ Վաշինգտոնը, և եթե Թուրքիան դուրս գա վերահսկողությունից, նրանք, ըստ Հովհաննիսյանի, առաջ կքաշեն քրդական գործոնը և այդկերպ որոշակիորեն կզսպեն Էրդողանին։
Հիշեցնենք, որ Ռուսաստանի պաշտպանության նախարար Սերգեյ Շոյգուն ղազախական Tengrinews.kz պարբերականին տված հարցազրույցում խոսելով Թուրքիայի հետ հարաբերությունների մասին՝ հիշեցրել է, որ Մոսկվայի ու Անկարայի միջև «շատ բարդ, շատ դժվար, բայց շատ արդյունավետ աշխատանք է ընթանում»:
Նրա խոսքով՝ աշխատանքը բարդ է, քանի որ «խանգարում են, խանգարում է նաև այն հանգամանքը, որ Թուրքիան ՆԱՏՕ-ի անդամ է»։