ԵՐԵՎԱՆ, 15 դեկտեմբերի – Sputnik. Շիրակի մարզպետ Նազելի Բաղդասարյանը հանդիպել է ՀՀ աշխատանքի և սոցիալական հարցերի նախարար Նարեկ Մկրտչյանի հետ։ Տեղեկությունը հայտնում են Շիրակի մարզպետարանից։
Հանդիպումը եղել է համատեղ սոցիալական ծրագրերի իրականացման, համագործակցության սոցիալական ծառայությունների բարելավման նպատակով։
«Շիրակի մարզը խոցելի մարզերից մեկն է աղքատության և գործազրկության մակարդակով, այնպես որ մեզ համար կարևոր է այդ խնդիրների մեղմացմանը միտված ցանկացած ծրագրի իրականացում։ Մենք պատրաստ ենք համագործակցության և ես, որպես մարզպետ, հաստատում եմ պատրաստակամությունս համատեղ աշխատանքի»,– նշել է Բաղդասարյանը։
Նա կարևորել է համագործակցությունը և՛ տարածքային կառավարման, և՛ տեղական ինքնակառավարման մարմինների մակարդակում, քանի որ փոխգործակցության արդյունքում հնարավոր կլինի հասցեական օգնություն տրամադրել խոցելի խմբերին։
Նարեկ Մկրտչյանն անդրադարձել է նախարարության կողմից իրականացվող մի շարք ծրագրերի, մասնավորապես, կարևորելով պատերազմի մասնակիցների, հաշմանդամություն ունեցող անձանց կայուն զբաղվածության ապահովմանն ուղղված ծրագրերը։
Հանդիպման ընթացքում քննարկվել են վերակազմավորման արդյունքում արդեն ձևավորված միասնական սոցիալական ծառայությունների գործունեության ոլորտին ու աշխատանքի արդյունավետությանը վերաբերող հարցեր։ Համաձայնություն է ձեռքբերվել, որ ՀՀ աշխատանքի և սոցիալական հարցերի նախարարության կողմից միջոցներ կուղղվեն Շիրակի մարզ՝ առավել խոցելի խմբերի կարիքների թեթևացման նպատակով։