ԵՐԵՎԱՆ, 15 դեկտեմբերի – Sputnik. Այսօր ՀՀ N զորամիավորումում անցկացվել են կրակի կառավարման մարզումներ։ Տեղեկությունը հայտնում է ՊՆ-ն` հավելելով, որ հրաձգային ստորաբաժանումների զինծառայողների անհատական վարժվածության կատարելագործման նպատակով են մարզումներն անցկացվել։
«Անձնակազմը մարտավարական բարդ պայմաններում, տարբեր զինատեսակների կիրառմամբ, կատարել է կրակային վարժանքներ և ցուցաբերել բարձր պատրաստություն»,–նշված է հաղորդագրության մեջ։
Բացի այդ, դեկտեմբերի 13-ից 15-ն էլ N զորամիավորումում անցկացվել են հրամանատարական հավաքներ: Դրանք կազմակերպվել են զորամասերի հրամանատարների և նրանց տեղակալների տեսական գիտելիքները, գործնական հմտությունները զարգացնելու, զորքերի ամենօրյա գործունեության ղեկավարման ունակություններն ամրապնդելու նպատակով։