ԵՐԵՎԱՆ, 15 դեկտեմբերի - Sputnik. Իշխանության գործողությունները ԱԺ «Հայաստան» խմբակցության համար անակընկալ չէին։ Այսօր ԱԺ տապալված արտահերթ նիստից հետ լրագրողների հետ զրույցում ասաց խմբակցության ղեկավար Սեյրան Օհանյանը։
«Հասկանալի էր, որ իրենք կարող են բոյկոտել նիստը։ Բայց նմանատիպ միջոցառումների անցկացումն անհրաժեշտություն է ՀՀ–ի ու ԱՀ–ի շուրջ ստեղծված իրավիճակում։ Անվտանգության միջավայրը, ներքին և արտաքին սպառնալիքները ու նաև այն իրադարձությունները, որոնք կատարվում են թե՛ արտաքին քաղաքականության մեջ, բանակցային պրոցեսում, թե՛ անվտանգության խնդիրներում և մանավանդ ՀՀ սահմաններում ու Արցախում ստիպում են, որ մենք համապատասխան միջոցառումներ ձեռնարկենք` իրավիճակը գնահատելու»,– ասաց Օհանյանը հավելելով, որ դա առաջին հերթին անհրաժեշտ է հենց իշխանությանը` հանրության մոտ վստահությունը վերականգնելու համար։
Ու քանի որ իշխանությունը սահմանազատման ու սահմանագծման թեմայով ո՛չ լսումներ, ո՛չ ԱԺ նիստ չի նախաձեռնում, նման նախաձեռնությամբ հանդես է գալիս ընդդիմությունը։
Բայց անգամ այս պարագայում իշխանությունը բոյկոտում է նիստն ու չի մասնակցում դրան։
«Այսօր ՀՀ–ում չկա որևէ անձ, ով կասի, թե որտեղով են այսօր անցնում մեր սահմանները։ ԽՍՀՄ կազմ մտնելուց հետո այդ սահմանները տարիների ընթացքում բավականին մեծ փոփոխությունների են ենթարկվել, ու սահմանազատման, սահմանագծման համար բավական լուրջ ուսումնասիրություններ են անհրաժեշտ,– ասաց Օհանյանը,– այսօրվա իշխանությունների բանավոր ցուցումով մեր զորքերը հետ են քաշվել` չհասկանալով, որ հետագայում այն ռազմավարական կետերը հանդիսանալու են շահարկման, բանակցությունների առարկա։ Այսօր դրանք հայտնվել են Ադրբեջանի տիրապետության տակ, ու մեծ խնդիր է լինելու այդտեղ սահմանազատում ու սահմանանշում իրականացնել»։
Բացի այդ, ըստ Օհանյանի, սահմանազատումն ու սահմանանշումը նշանակում են Ադրբեջանի տարածքային ամբողջականության ճանաչում, ինչն էլ իր հերթին նշանակում է քար գցել Արցախի ճակատագրի վրա։
Ըստ Օհանյանի, հենց այդ մտահոգությամբ է, որ խորհրդարանական ընդդիմությունը որոշել է վերահսկողական մեխանիզմներ իրականացնել ՀՀ գործադիր իշխանության քայլերի նկատմամբ` ՀՀ իշխանությանը զերծ պահելու ընթացակարգերի խախտմամբ որևէ միջազգային պայմանավորվածության գնալուց։
Սահմանագծման և սահմանազատման հիմնախնդիրների մասին ԱԺ «Հայաստան» խմբակցության նախաձեռնությամբ հրավիրված Ազգային ժողովի արտահերթ նիստն այսօր չկայացավ, քանի որ «Քաղաքացիական պայմանագիր» խմբակցության պատգամավորները նիստին չէին ներկայացել։ Ներկա էր ընդհանուր 30 պատգամավոր, մինչդեռ քվորումի ապահովման ու նիստը սկսելու համար անհրաժեշտ է առնվազն 54 ձայն: