ԵՐԵՎԱՆ, 14 դեկտեմբերի – Sputnik. Ընդդիմությունը կարող է կորցնել ԱԺ պաշտպանության և անվտանգության հարցերի մշտական հանձնաժողովի նախագահի տեղակալի պաշտոնը, եթե շարունակի թեկնածու չառաջադրել։
Այս մասին այսօր հանձնաժողովի արտահերթ նիստում հայտարարեց հանձնաժողովի նախագահ Անդրանիկ Քոչարյանը։
«Ըստ ԱԺ Կանոնակարգ օրենքի 138 հոդվածի, տվյալ իրավասությունն անցնում է ամենամեծ գործակիցն ունեցող քաղաքական ուժին, այսինքն` «Քաղաքացիական պայմանագրին»։ Հոդվածի 12-րդ կետը հստակ արձանագրում է. «Եթե խմբակցությունը սահմանված ժամկետում ԱԺ նախագահի կամ նրա տեղակալի` իրեն վերապահված թափուր պաշտոնում թեկնածու չի առաջադրում, ապա տվյալ պաշտոնում թեկնածու առաջադրելու իրավունքն անցնում է սույն հոդվածի 4-րդ մասի` խմբակցությունների գործակցի հաշվարկի սկզբունքով ամենամեծ գործակիցն ունեցող խմբակցությանը»,– ասաց Քոչարյանը։
Հանձնաժողովի նախագահը սակայն հայտարարեց, որ, անկախ օրենքով իրենց վերապահված այդ իրավունքի, ՔՊ–ն այսօր թեկնածու չի առաջադրել։
«Դա խոսում է այն մասին, որ մենք չենք շտապում ընդդիմությանը հասանելիք թափուր պաշտոնն անմիջապես վերցնել և ակնկալում ենք, որ այս մեկ շաբաթվա ընթացքում «Հայաստան» խմբակցությունը «Պատիվ ունեմ»–ի հետ կոնսենսուսի կհասնեն ու մեզ կներկայացնեն հնարավոր տարբերակներ»,– ասաց Քոչարյանը։
Նշենք, որ ընդդիմադիր երկու խմբակցությունների անդամներն այսօր հանձնաժողովի նիստին չէին մասնակցում։
Հիշեցնենք` ԱԺ պաշտպանության և անվտանգության հարցերի հանձնաժողովի փոխնախագահի պաշտոնում «Հայաստան» խմբակցությունը 14 անգամ առաջադրել էր Արթուր Ղազինյանի թեկնածությունը, իսկ ԱԺ մեծամասնությունը 14 անգամ մերժել էր նրան։
Դեկտեմբերի 7-ի նիստում «Հայաստանն» այլևս որևէ թեկնածու չառաջադրեց` այդ կերպ արտահայտելով իր վերաբերմունքն իրենց թեկնածուին 14 անգամ մերժած իշխանական ուժի նկատմամբ։