ԵՐԵՎԱՆ, 14 դեկտեմբերի – Sputnik. ՀՀ մարդու իրավունքների պաշտպան Արման Թաթոյանը առանձնազրույցներ է ունեցել Բաքվից Հայաստան վերադառնալուց հետո կալանավորված հայ զինծառայողների հետ։ Այս մասին նա գրել է Facebook-ի իր էջում։
««Արմավիր» և «Նուբարաշեն» ՔԿՀ-ներում նրանց հետ տեղի են ունեցել առանձնազրույցներ, ուսումնասիրվել են փաստաթղթեր, ինչպես նաև նրանց իրավունքների վիճակը, այդ թվում՝ գերեվարումից սկսած»,– նշել է Թաթոյանը:
Արդեն իսկ ամփոփվել են այցերը, որոնց արդյունքներով պետական համապատասխան մարմիններին կհասցեագրվեն անհրաժեշտ գրություններ: Կձեռնարկվեն այլ անհրաժեշտ քայլեր, նշել է Թաթոյանը։
Հիշեցնենք, որ նոյեմբերի 16-ին Սյունիքի Իշխանասարի հատվածում տեղակայված 3 հայկական մարտական դիրքերի վրա հակառակորդի հարձակումից հետո գերեվարված, ապա Հայաստան վերադարձած զինծառայողներից մի քանիսը կալանավորվել են։
Ըստ քննչական կոմիտեի հաղորդագրության` մարտական հերթապահությունում ընդգրկված դիրքի պատասխանատուն, դիրքի ավագն ու երկու դիտորդները խախտել են ՀՀ ԶՈւ ներքին ծառայության կանոնագիրքը, մարտական հերթապահության կազմակերպման և իրականացման կանոնադրությամբ սահմանված մարտական հերթապահության կրման կանոնները։
Մասնավորապես` տեղեկանալով հակառակորդի հարձակման մասին` դիրքերի զինծառայողները, ունենալով զենք կիրառելու իրավասություն, մարտական դիրքի վրա հարձակված հակառակորդի զինծառայողներին վնասազերծելու, զինաթափելու փոխարեն փորձել են բանակցություններ վարել մարտական դիրքի պահպանության տարածք ներխուժած հակառակորդի զինծառայողների հետ, որոնք փորձել են գերեվարել մարտական հերթապահություն իրականացնող անձնակազմին։
Դիրքերի անձնակազմը թողել է մարտական դիրքերն ու դիմել փախուստի, որի հետևանքով Ադրբեջանի զինված ուժերի զինծառայողները ներխուժել են ՀՀ ինքնիշխան տարածք՝ մարտական դիրքեր։ Փախուստի դիմած 24 զինծառայողները հակառակորդի կողմից շրջափակվել ու գերեվարվել են։
Մարտական դիրքի պատասխանատու, լեյտենանտ Ս.Ա.-ն, դիրքի ավագ, կրտսեր սերժանտ Ա.Ա.-ն, դիտորդներ Ռ.Ն.-ն և Ա.Մ.-ն ՀՀ վերադառնալուց հետո ձերբակալվել են ՀՀ քրեական օրենսգրքի 365-րդ հոդվածի 3-րդ մասի (մարտական հերթապահություն կամ մարտական ծառայություն կրելու կանոնները խախտելը, որն առաջացրել է ծանր հետևանքներ) կասկածանքով։
Իսկ դեկտեմբերի 8-ին և 9-ին նրանց առաջադրված մեղադրանքներով կալանավորվել են։