ԵՐԵՎԱՆ, 14 դեկտեմբերի - Sputnik. Առողջապահության համաշխարհային կազմակերպությունը սպասում է կորոնավիրուսի «Օմիկրոն» շտամից հոսպիտալացումների և մահվան դեպքերի թվի աճ։ Տեղեկությունը հայտնում է ՌԻԱ Նովոստին՝ հղում անելով ԱՀԿ-ի մամուլի ծառայությանը:
«Օմիկրոնը» COVID-19-ի նոր մանրէահիմք է, որն ԱՀԿ-ի կողմից ճանաչվել է «անհանգստություն առաջացնող»։ Այս ենթատեսակով վարակման հետևանքով արդեն մահ է գրանցվել Մեծ Բրիտանիայում։
«Մտահոգություն առաջացնող մանրէահիմքով դեպքերի թվի ավելացման հետ կապված՝ ամբողջ աշխարհում սպասում ենք հոսպիտալացումների ու նույնիսկ մահերի քանակի մասին տեղեկատվության հայտնվելուն», - ասել են ԱՀԿ-ից։
Ընդ որում, կազմակերպությունում նշել են, որ շատ պետություններ պարզապես հիվանդների հետազոտությունների մեջ «Օմիկրոն» հայտնաբերելու հնարավորություն չունեն։
«Այդ պատճառով «Օմիկրոնով» պայմանավորված մահվան մասին տեղեկությունները դժվար է հստակ ներկայացնել։ «Օմիկրոնի» ծանրության մասին ավելի մանրամասն տեղեկատվություն է սպասվում առաջիկա շաբաթներին»,-պարզաբանել են մամուլի ծառայությունում:
Միաժամանակ Առողջապահության համաշխարհային կազմակերպությունում նշում են, որ «Օմիկրոնի» ամբողջական կլինիկական պատկերը հավաքելու համար գիտնականներին ավելի շատ տեղեկատվություն է անհրաժեշտ։